اسلام آباد (مانیٹرنگ ڈیسک)زینب قتل کیس میں اہم پیش رفت، قاتل کی ایک اور سی سی ٹی وی ویڈیو منظر عام پر آگئی۔ تفصیلات کے مطابق زینب قتل کیس میں اہم پیش رفت سامنے آئی ہے جس میں زینب کے قاتل کی ایک اور سی سی ٹی وی ویڈیو منظر عام پر آگئی ہے۔ ویڈیو میں واضح طور پر دیکھا جا سکتا ہے کہ ایک شخص جو شلوار قمیض میں ملبوس ہے اور اس نے کوٹ بھی پہن رکھا ہے سپارہ پڑھنے جانے والی زینب کو اپنی طرف آنے کا اشارہ کرتا ہے جس پر زینب

اس شخص کے پیچھے چلی جاتی ہے۔ تحقیقاتی ادارے اس ویڈیو کو انتہائی اہم قرار دے رہے ہیں اور امکان ظاہر کیا جا رہا ہے کہ اس ویڈیو کے بعد تحقیقاتی ادارے زینب کے قاتل کے انتہائی قریب پہنچ چکے ہیں اور کسی بھی وقت اس کو دبوچ لیا جائے گا۔ واضح رہے کہ گزشتہ ہفتے قصور میں 7سالہ ننھی زینب کو اغوا کے بعد زیادتی کا نشانہ بنانے کے بعد بیدردی سے گلا گھونٹ کر قتل کر دیا گیا تھا جبکہ قاتل نے اس کو مارنے کے بعد لاش کوڑے کے ڈھیر میں پھینک دی تھی۔