وزیر اعلیٰ پنجاب نے علی الصبح قصور میں کمسن شہید زینب کے گھر جا کر سوگواران سے اظہار افسوس کیا۔کمسن زینب سے والد سے اپنے گہرے دکھ کا اظہار کرتے ہوئے وزیر اعلیٰ پنجاب نے یہ یقین دہانی کروائی کہ وہ مجرم کو جلد از جلد کٹہرے میں لا کرکیفر کردار تک پہنچائیں گے۔
سوگواران سے اپنے رنج و الم کے جذبات بیان کرتے ہوئے وزیر اعلیٰ کا کہنا تھا کہ زینب کی ساتھ اس نا انصافی کرنے والے کااتنا عبرتناک انجام ہو گا کہ آئندہ قوم کی کو ئی زینب اس آزمائش سے نہ گزرے۔پولیس اور تمام متعلقہ محکمے اس واقعے کی تفتیش میں مصروف ہیں اور مجرم کے گرد گھیرا تنگ کیا جا رہا ہے عنقریب وہ اپنے انجام کو پہنچے گا اور اس واقعے کی از خود نگرانی کی ذمہ داری بھی اٹھائی۔اس کے ساتھ ساتھ وزیر اعلیٰ نے مشتعل ہجوم پر فائرنگ کا نوٹس بھی لے لیا اور جن پولیس افسران نے لوگوں پر فائرنگ کی انہیں گرفتار بھی کیا جا چکا ہے اور ان سے پوچھ گچھ جاری ہے۔ انہوں نے کہا کہ کوئی بھی انسان ماورائے قانون نہیں ہے اور ظلم و زیادتی کسی طور برداشت نہیں کی جائے گی۔ جس انسان کے ساتھ بھی نا روا سلوک برتا گیا ہے وہ انصاف کا مستحق ہے۔
