اسلام آباد (مانیٹرنگ ڈیسک) وفاقی دارالحکومت میں واقع ایک امام بار گاہ کے باہر فائرنگ میں ایک شخص ہلاک جبکہ چار زخمی ہو گئے ،نا معلوم موٹرسائیکل سواروں کی جانب سے فائرنگ امام بار گاہ میں نماز ادا کر کے نکلنے والے نمازیوں پر کی گئی۔بتایا گیاہے کہ بدھ کی شام کو سیکٹر آئی ایٹ میں واقع امام بار گاہ باب العلم کے باہر نامعلوم مسلح موٹر سائیکل سواروں نے اندھا دھند فائرنگ کی جس کے نتیجے میں ایک شخص سید حب دار شاہ جاں بحق جبکہ چارزخمی ہوگئے۔ فائرنگ کے بعد بھگدڑ مچ گئی اور لوگ اپنی جانیں بچانے کے لئے بھاگ کھڑے ہوئے ۔فائرنگ

امام بار گاہ میں نماز ادا کر کے نکلنے والے نمازیوں پر کی گئی جس کے بعد حملہ آور راولپنڈی کی جانب فرار ہونے میں کامیاب ہو گئے ۔اطلاع ملتے ہی پولیس ، حساس ادارے اور ریسکیو ٹیمیں موقع پر پہنچ گئیں جنہوں نے لاش اور زخمیوں کو پمز ہسپتال منتقل کر دیا ۔حساس اداروں نے جائے وقوعہ سے شواہد اکٹھے کر لئے ہیں جبکہ ملزمان کی تلاش کے لئے ناکہ بندی بھی کر لی گئی ہے ۔ذرائع کے مطابق امام بار گاہ کی سی سی ٹی وی فوٹیج حاصل کر کے واقعے کی تحقیقات شروع کر دی گئی ہیں۔واقعہ کے خلاف امام بارگاہ کے باہر احتجاجی مظاہرہ بھی کیا گیا۔

موضوعات:وفاقی دارالحکومت میں واقع ایک امام بار گاہ کے باہر فائرنگ