اسلام آباد (مانیٹرنگ ڈیسک)تحریک انصاف کی رہنما شیریں مزاری نے اپنی بیٹی کے سوشل میڈیا پر جاری بیان کی شدید مذمت کردی۔شیریں مزاری نے  ٹویٹر پر ایک پیغام جاری کیا جس میں انہوں نے اپنی بیٹی پر برہمی کا اظہار کرتے ہوئے کہا کہ وہ اپنی بیٹی کے خیالات سے متفق نہیں ہیں۔ میں یہ بات واضح کر دینا چاہتی ہوں کہ میری بیٹی نے ٹویٹر پر پوسٹ کی گئی ایک ویڈیو میں پاک فوج کے خلاف جو بھی زبان استعمال کی میں اس کے خیالات

سے متفق نہیں ہوں۔میں اپنی بیٹی کی طرف سے مسلح افواج کے خلاف استعمال کی گئی غلیظ زبان کی بھی سخت مذمت کرتی ہوں۔ میں اپنی بیٹی سے پیار کرتی ہوں لیکن میں اس کے خیالات اور استعمال کی جانے والی زبان سے واضح طور پر اختلاف کرتی ہوں۔یاد رہے کہ پاکستان تحریک انصاف کی اہم رہنماءشیریں مزاری کی بیٹی ایمان مزاری تحریک لبیک کا دھرنا ختم کرانے میں کردار ادا کرنے اور ڈی جی رینجرز پنجاب میجر جنرل اظہر نوید کی جانب سے چند اراکین میں پیسے تقسیم کرنے پربھڑک اٹھیں تھیں،۔سوشل میڈیا پر جاری بیان میں ایمان مزاری کی جانب سے تحریک لبیک کے دھرنا مظاہرین کو دہشت گرد کہا گیا اور ان کیساتھ معاہدہ کرنے پر پاک فوج کو تنقید کا نشانہ بناتے ہوئے کہا کہ ایسا کر کے پاک فوج کے افسران و جوانوں   کی قربانیوں کی بے عزتی کی گئی ہے۔ان کا کہنا تھا کہ فوج نے 70 سال میں یہ نہیں سیکھا کہ یہ لوگ ملک کو جلا کر رکھ دیں گے۔ یہ لوگ کسی کیساتھ بھی مخلص نہیں ہیں اور صرف نفرت پھیلانے آئے ہیں۔

موضوعات:ایمان مزاری شیریں مزاری