اسلام آباد(مانیٹرنگ ڈیسک)فیض آباد میں تحریک لبیک کے 20روز سے جاری دھرنے کو ختم کرانے کیلئے آج صبح آپریشن شروع کر دیا گیا ہے ، 4گھنٹے سے جاری آپریشن کی صورتحال ہر گزرتے وقت کے ساتھ بدتر ہوتی جا رہی ہے اور انتظامیہ حالات کو کنٹرول کرنےبری طرح ناکام ہوتی نظر آرہی ہے۔ پولیس اور ایف سی اہلکار بھی مظاہرین کے پتھرائو کے آگے بے بس نظر آرہے ہیں ۔ ذرائع کے مطابق مظاہرین کو راولپنڈی شہر میں موجود ان

کے حامیوں کی بھی مکمل سپورٹ حاصل ہے جو کہ آپریشن شروع ہوتے ہی فیض آباد پہنچ گئے تھے جبکہ راولپنڈی شہر میں مختلف جگہوں پر تحریک لبیک کے کارکنوں اور حمایتیوں نے سڑکیں بلاک کر دی ہیں اور ٹائر جلا کر احتجاج کا سلسلہ شروع کر دیا ہے۔ اس صورتحال کو دیکھتے ہوئے راولپنڈی انتظامیہ نے شہر بھر میں کرفیو لگانے پر غور شروع کر دیا ہے جس پر فیصلہ ہوتے ہی جلد ہی کرفیو کے اعلان کا امکان ہے۔