لاہور،کراچی(مانیٹڑنگ ڈیسک)اسلام آباد میں تحریک لبیک یارسولؐ کا دھرنا جاری ہے ،حکومت اور مذہبی قائدین کے درمیان مذاکرات تاحال کسی نتیجے پر نہیں پہنچ پائے ،ادھرچئیرمین سنی اتحاد کونسل صاحبزادہ حامد رضا نے حکومت کو خبر دار کرتے ہوئے کہا ہے کہ اگر دھرنے پر طاقت استعمال ہوئی تو میلاد جلوسوں کا رخ اسلام آباد کی طرف کر دیں گے۔انہوں نے کہا کہ حکومت نے دھرنے کا مسئلہ سلجھانا ہے تو زاہد حامد استعفیٰ دے۔

حکومت نے پرامن دھرنے میں شرپسند داخل کرنے کا منصوبہ تیار کر لیا ہے۔ دھرنے میں بیٹھے شمع رسالت کے پروانے سرخرو ہوں گے۔ الیکشن سے پہلے نظام مصطفے کا پیغام گھر گھر پہنچائیں گے۔ نواز شریف کا نظریہ صرف اور صرف کرپشن ہے۔ نااہل وزیراعظم کی عدلیہ مخالف بیان بازی ملک سے غداری ہے۔واضح رہے تحریک لبیکؐ کے تحت وفاقی دارالحکومت اسلام آباد میں جاری دھرنے کی حمایت میں نمائش چورنگی کراچی پر تیسرے روز بھی دھرنا جاری رہا۔ دھرنے میں رویت ہلال کمیٹی کے چیئرمین مفتی منیب الرحمٰن نے شرکاءسے خطاب کرتے ہوئے کہا کہ سیاسی مقاصد کےلئے126دن کےدھرنے سے تو کسی کو تکلیف نہیں ہوئی آج تحفظ ختم نبوت کے لئے جو دھرنا دیا گیا اس پر شور مچایا جارہا ہے،کیا اس وقت لوگوں کو تکلیف نہیں ہوئی تھی؟ حکومت اس مسئلے کی حساسیت کو سمجھے ، جو بات ایک ہفتے میں حل ہوگی وہ کل حل کرے جو کل حل کرنی   ہے وہ آج اور ابھی کرے۔15روز سے تحفظ ختم نبوت کی خاطر موسم کی سختیاں برداشت کرنے والوں کو ہم خراج تحسین پیش کرتے ہیں، حکومت یاد رکھے پورے پاکستان کے علماء کرام علامہ خادم حسین رضوی کی پشت پر ہیں، ہر طرح کی محاذ آرائی سے گریز کرنا چاہئے، پاکستان کسی محاذ آرائی کا متحمل نہیں ہو سکتا۔ انہوں نے کہا کہ حکومت اس معاملے کی حساسیت کو سمجھے،یہ آفت کوئی آسمانی نہیں بلکہ حکومت کے اپنے ہاتھوں کے کرتوت ہیں،۔اس موقع پر ان کے ہمراہ دیگر علما بھی تھے جنہوں نے مفتی منیب کی حمایت کا اعلان کیا۔