اسلام آباد(مانیٹرنگ ڈیسک)تحریک لبیک یا رسول اللہ کے دھرنے کے قریب سے مشتبہ شخص گرفتار، نامعلوم مقام پر منتقل۔ نجی ٹی وی نائنٹی ٹو نیوز کی رپورٹ کے مطابق تحریک لبیک یا رسول اللہ کے دھرنے کے قریب سےایک مشتبہ شخص کو قانون نافذ کرنے والے اداروں نے گرفتار کر لیا ہے۔ گرفتار شخص کے قبضے سے 492ڈیٹونیٹر اور196 ایکسپلوزو سٹکس برآمد ہوئی ہیں۔گرفتار شخص کو تفتیش کیلئے نامعلوم مقام پر منتقل کر دیا گیا ہے۔ واضح رہے کہ ا س سے قبل بھی ایک مشتبہ شخص کو دھرنے کے قریب سے
گرفتار ہو چکا ہے۔ تحریک لبیک یا رسول اللہ کا دھرنا آج 15ویں روز میں داخل ہو چکا ہے جبکہ اسلام آباد ہائیکورٹ بھی دھرنا ختم کرانے کیلئے احکامات جاری کر چکی ہے۔ حکومت دھرنا کے قائدین سے مذاکرات جاری رکھے ہوئے ہے جبکہ وزیر داخلہ احسن اقبال نے آج اسلام آباد ہائیکورٹ میں طلبی کے بعد میڈیا سے گفتگو کرتے ہوئے کہا ہے کہ ملک دشمن عناصر لال مسجد اور سانحہ ماڈل ٹائون جیسا سانحہ کروانے کیلئے سرگرم ہیں جبکہ ہم پر امن طریقے سے دھرنا ختم کرانے کی ہر ممکن کوشش کررہے ہیں۔
