اسلام آباد(این این آئی)وفاقی وزیر ماحولیات سینیٹر مشاہد اللہ خان نے کہا ہے کہ قومی اتحاد کسی چڑیا کا نہیں ٗاجتماعی اقدامات اور فیصلوں کا نام ہے ، نواز شریف کو انتقامی کارروائیوں کا نشانہ بنایا جارہا ہے ٗعدلیہ آزاد ہے تو پھر ماتحت عدالتیں آزاد کیوں نہیں ؟فوج کی جانب سے قومی اتحاد کی بات اچھا اقدام ہے، اس کو ہم خوش آئند اور خوش آمدید کہتے ہیں مانیٹرنگ جج بٹھانے کا مقصد کیا ہے؟چار سالوں میں دہشت گردی اور

لوڈ شیڈنگ کا خاتمہ ایک معجزہ ہی ہے ٗ ایک انٹرویو میں مسلم لیگ (ن) کے سینئر رہنما اور وفاقی وزیر ماحولیات سینیٹر مشاہد اللہ خان نے کہا کہ نواز شریف ایک شخصیت کا نام ہے جو بہر حال اپنی ذات میں انجمن ضرور ہیں، سٹاک ایکسچینج 54 ہزار سے 39 ہزار پر آگیا ہے ٗ دنیا سمیت چین بھی پاکستان کی گرتی معیشت پر حیرت سے تشویش کا اظہار کررہا ہے۔ انہوں نے کہا کہ ہمارا ایجنڈا وہی ہے جو چار سال پہلے تھا ٗپاکستان لوڈ شیڈنگ کی وجہ سے اندھیروں میں ڈوبا ہوا تھا ٗدہشت گردی اپنے عروج پر تھی ٗ پاکستان باوقار اندازمیں عالمی سطح پر اپنا کردار ادا نہیں کررہا تھا، حکومت سنبھالنے کے بعد سٹاک ایکسچینج 20 ہزار سے 54 ہزار تک آگیا، سی پیک جیسے منصوبے شروع ہوئے، 7 مماک نے سی پیک میں شمولیت کی خواہش کا اظہار کیا، پاکستانی معیشت دن بدن ترقی کی منزل پر چلتی گئی، ہم نے ملک سے دہشت گردی کا خاتمہ کیا ، پاکستان جیسے ملک میں چار سالوں میں دہشت گردی اور لوڈ شیڈنگ کا خاتمہ ایک معجزہ ہی ہے۔انہوں نے کہا کہ پاکستان میں پہلے ٹارگٹ کلنگ ، بوری بند لاشیں ملتی تھیں جبکہ افغانستان میں قیام امن کیلئے دنیا کی بہترین فوجیں اور سرمائے کے ساتھ امن قائم کرنے میں ناکام رہی ہیں۔

انہوں نے کہا کہ نیب کورٹ ماتحت ادارہ ہے، عدالتیں آزاد ہوچکی ہیں، نواز شریف نے مختلف اداروں کے ساتھ مل کر عدلیہ کی آزادی کیلئے جدوجہد کی، اگر سپریم کورٹ اور ہائی کورٹ آزاد ہیں تو ماتحت عدالتیں آزاد کیوں نہیں ہیں ؟ کیوں آپ نے اس پر مانیٹرنگ جج بٹھا رکھا ہے؟ نواز شریف کے خلاف خاص قسم کی انتقامی کارروائی شروع ہے، یہ وہی کیسز ہیں جو مشرف نے شروع کئے تھے ، حدیبیہ کیس سے پہلے بھی کچھ نہیں ملا تھا اب پھر کھول دیا ہے، پہلے طیارہ ہائی جیکنگ کیس کا الزام لگایا اور پھر 27 سال عمر قید کی سزا سنا دی جس پر لوگ ہنستے تھے۔سینیٹر مشاہد اللہ خان نے کہاکہ یہی باتیں ہیں جس سے قومی اتحاد نہیں ہوتا، قومی اتحاد کسی چڑیا کا نام نہیں ہے ٗقومی اتحاد اجتماعی اقدامات اور فیصلوں کا نام ہے، جو آپ اجتماعی طو رپر کرتے ہیں ، اجتماعی فیصلوں کے اثرات نہ صرف پاکستان بلکہ پوری دنیا پر پڑتے ہیں۔ انہوں نے کہا کہ 456 لوگوں کا پانامہ میں نام آیا ہے ٗ نواز شریف کا نام بھی نہیں تھا ،باقی لوگوں کے احتساب کرنا کیوں بھول گئے ؟ پھر ان لوگوں کے احتساب کی باری کب آئیگی؟ حکومت نے عدالتیں نہیں لگائیں عدلیہ آزاد ہے تو پھر کیوں کارروائی شروع نہیں کرتی ، ایک ایک بندے کی 34 ٗ34 آف شور کمپنیاں ہیں، عمران خان اور اس کی بہن کی بھی آف شور کمپنی ہے ٗنواز شریف کا نقصان پاکستان کا نقصان ہے ، جو ہمارے سمیت بہت سے پاکستانی لوگ سمجھتے ہیں ۔انہوں نے کہا کہ فوج کی جانب سے قومی اتحاد کی بات اچھا اقدام ہے، اس کو ہم خوش آئند اور خوش آمدید کہتے ہیں ، اس سے اندرونی اور بیرونی سازشوں کا قلعہ قمع کر سکے گا۔

موضوعات:فوج مشاہد اللہ خان