لاہور( این این آئی)حال ہی میں تحریک انصاف کو خیر باد کہنے والے فاروق امجد میر نے کہا ہے کہ فی الوقت تو سیاست سے توبہ ہے ، موثر تھنک ٹینک بنا کر اس پلیٹ فارم سے ملک کیلئے کردار ادا کرنا چاہتا ہوں ، پی ٹی آئی میں اب کوئی نظریہ نہیں،پیسے والے لوگوں کی قدر ہے اور دیرینہ رہنمائوں اور کارکنوں کو پوچھا تک نہیں جاتا ۔ ایک انٹر ویو میں انہوںنے کہا کہ اندرونی اختلافات کی وجہ سے تحریک انصاف

اور عمران خان کو نقصان ہورہا ہے ۔ پی ٹی آئی میں کارکنوں کو سپورٹ نہیں کیا جاتا اسی وجہ سے این اے 120کے ضمنی انتخاب کے سلسلہ میں منعقدہ مزنگ کا جلسہ ناکام ہوا اور شرکاء عمران خان کی تقریر کے دروان ہی اٹھ کر جارہے تھے ۔ انہوں نے کہا کہ تحریک انصاف میں ایسے لوگوں کی اکثریت ہے جن کا اسے بنانے میں کوئی کردار نہیں۔تحریک انصا ف میں اب کوئی نظریہ نہیں ،اب پارٹی میںصرف ان لوگوں کی قدر ہے جو پیسے والے ہیں ۔انہوں نے مزید کہا کہ نواز شریف کے فیصلے میں اپیل کا حق نہ دینے پر اعتراض ہے کیونکہ جب کسی درجہ چہارم کے ملازم کو بھی نکالا جاتا ہے تو اس کے مختلف مراحل ہوتے ہیں اور اسے اپیل کا حق حاصل ہوتا ہے ۔انہوںنے کسی سیاسی جماعت میں شمولیت کے حوالے سے سوال کے جواب میں کہا کہ فی الوقت سیاست سے توبہ ہے ،کسی سیاسی جماعت میں شامل نہیں ہو رہا بلکہ ایک موثر تھنک ٹینک بنا کر اس پلیٹ فارم سے پاکستان کے لئے کردار ادا کریں گے۔تھنک ٹینک میں میڈیا سمیت تمام اسٹیک ہولڈرز کو شامل کیا جائے گا۔