اسلام آباد (مانیٹرنگ ڈیسک)وزیر اعلیٰ پنجاب شہبازشریف نے کہا ہے کہ آرمی پبلک اسکول پشاور کے معصوم بچوں کو مارنے والے سفاک درندوں پر زمین تنگ ہوچکی ہے، دہشت گردوں کا مکمل صفایا کر کے مٹی کا یہ قرض اتاریں گے۔نجی ٹی وی چینل جیو نیوز کے مطابق آرمی پبلک سکول پشاور کے شہدا کی دوسری برسی کے موقع پر ایک پیغام میں وزیر اعلیٰ شہبازشریف نے کہا ہے کہ عظیم شہداکے خون کا ایک ایک قطرہ اس مٹی پر قر ض ہے، دہشتگردی کیخلاف جنگ اپنے منطقی انجام تک پہنچ رہی ہے اوردہشت گردوں کا نام و نشان مٹا کروطن کو امن و سکون کا گہوارا بنائیں گے۔ان کا کہنا تھا کہ قوم کی تائید اورحمایت سے پاک سرزمین کو آخری دہشت گرد کے ناپاک سے وجود سے بھی پاک کریں گے ،قائد اعظم محمد علی جناحؒ کے پاکستان میں دہشت گردی اورانتہا پسندی کی قطعاً کوئی گنجائش نہیں۔
شہبازشریف نے مزید کہاکہ برداشت اورمیانہ روی پر مبنی معاشرے کے قیام کاعظیم مقصد ضرور حاصل کریں گے۔ان کا کہنا تھا کہ پوری قوم آج آرمی پبلک سکول پشاورکے عظیم شہداء کی لازوال قربانیوں کو بھر پور اندا ز میں خراج عقیدت پیش کررہی ہے ۔