اسلام آباد (نیوز ڈیسک) لاہور الیکٹرک سپلائی کمپنی (لیسکو) نے نیٹ میٹرنگ کے صارفین کے لیے بجلی کے ایکسپورٹ ریٹ میں کمی کا اعلان کر دیا ہے،

جس کے بعد نئی بلنگ پالیسی نافذ کر دی گئی ہے۔لیسکو کی جانب سے جاری کردہ تفصیلات کے مطابق نیٹ میٹرنگ صارفین کے لیے فی یونٹ ایکسپورٹ ریٹ میں 66 پیسے کمی کی گئی ہے۔ اس کمی کے بعد ایک یونٹ بجلی کا نیا ایکسپورٹ ریٹ 25 روپے 98 پیسے سے گھٹ کر 25 روپے 32 پیسے مقرر کر دیا گیا ہے۔نوٹیفکیشن میں بتایا گیا ہے کہ یہ نئی بلنگ پالیسی جنوری 2026 کے بلنگ سائیکل سے لاگو ہو گی۔ اس کے تحت منظور شدہ ڈی جی (Distributed Generation) صلاحیت سے زائد بجلی ایکسپورٹ کرنے پر پابندی ہو گی، جبکہ اضافی یونٹس کو ڈی جی کپیسٹی کے تناسب سے ایڈجسٹ کیا جائے گا۔لیسکو کے مطابق سی پی 22 پالیسی کے تحت ایکسپورٹ یونٹس کی ایڈجسٹمنٹ کا عمل بدستور جاری رہے گا، تاہم نیٹ میٹرنگ صارفین کے لیے ایکسپورٹ ایم ڈی آئی کا درست اندراج لازمی قرار دیا گیا ہے۔