اسلام آباد(مانیٹرنگ ڈیسک) پاکستان مسلم لیگ (ن) نے انٹرا پارٹی الیکشن میں ریکارڈ قائم کر دیا۔ کھڑے کھڑے دس اہم عہدوں پر امیدوار بلامقابلہ منتخب ہو گئے۔ تفصیل کے مطابق پاکستان مسلم لیگ (ن) کے 4 سال بعد انٹرا پارٹی الیکشن میں وزیر اعظم نواز شریف مسلم لیگ (ن) کے بلامقابلہ صدرمنتخب ہوگئے ،مشیرخارجہ سرتاج عزیز،سکند ر حیات خان مسلم لیگ (ن) کے بلامقابلہ سینئر نائب صدر منتخب ہوئے۔منگل کو مسلم لیگ (ن) کی پارٹی انتخابات کی مرکزی کونسل کا چھٹا اجلاس کنونشن سنٹر اسلام آباد میں ہوا۔پارٹی انتخابات میں وزیر اعظم نواز شریف پاکستان مسلم لیگ (ن) کے بلامقابلہ صدرمنتخب ہوئے ،وزیراعظم کو پارٹی رہنماؤں نے صدر منتخب ہونے پر فرداًفرداً مبارکباد پیش کی۔نوازشریف کے صدر منتخب ہونے پر لیگی رہنماؤں نے نعرے بھی لگائے۔راجہ ظفر الحق پاکستان مسلم لیگ ن کے بلامقابلہ چیئرمین منتخب ہوئے ،سرتاج عزیز،سکندر حیات خان،چنگیز خان مری ، سرانجام خان،سردار یعقوب خان ناصر،امداد حسین چانڈیو سینئر نائب صدر منتخب ہوئے،سینیٹر پرویز رشید بلامقابلہ سیکرٹری مالیات، مشاہد اللہ خان پاکستان مسلم لیگ ن کے بلامقابلہ سیکریٹری اطلاعات منتخب ہوئے ۔
پارٹی کے کسی عہدیدار کی نامزدگی کا اختیار پارٹی صدر محمد نوازشریف کو دینے اور مقبوضہ کشمیر میں نہتے کشمیریوں پر بھارتی مظالم کیخلاف مذمتی قرارداد منظور کی گئیں۔انٹرا پارٹی الیکشن کا فیصلہ وزیراعظم کی زیر صدارت مرکزی مجلس عاملہ کے اجلاس میں کیا گیا تھا۔اس کام کیلئے پارٹی رہنماوں نے چوہدری جعفر اقبال کا انتخاب کیا تھا۔اسلام آباد میں وزیرا عظم کی زیر صدرات گزشتہ روز ن لیگ کے اہم رہنماؤں کا اجلاس ہوا جس میں وزیر اعلیٰ پنجاب شہباز شریف،وفاقی وزراء4 اسحاق ڈار،پرویز رشید،چوہدری نثار،خواجہ آصف سمیت دیگراہم رہنماؤں نے شرکت کی تھی۔واضح رہے کہ گزشتہ ہفتے الیکشن کمیشن آف پاکستان نے مسلم لیگ (ن) کو انتخابی نشان الاٹ کرنے سے انکار کیا اور جلد پارٹی انتخابات کرانے کی ہدایت کی تھی۔