راولپنڈی /لاہور(آئی این پی)پاکستان آرمی کی میزبانی میں جسمانی پھرتی اور جنگی صلاحیتوں کے اظہار کے بین الاقوامی مقابلوں کا آغاز(کل)منگل سے ہو گا، جبکہ مقابلوں کیلئے تیاریوں کو حتمی شکل دیدی گئی۔آئی ایس پی آر کے مطابق غیر ملکی افواج کی ٹیموں کی پہلی بین الاقوامی پی اے سی ای ایس چیمپئن شپ دو ہزار سولہ کا آغاز اٹھارہ اکتوبر سے لاہور کے ایوب اسٹیڈیم میں ہوگا۔ جس میں مجموعی طور پر غیر ملکی افواج کے تین سو ستر فوجی حصہ لیں گے۔ آئی ایس پی آر کا کہنا ہے کہ چھ روز تک جاری رہنے والے مقابلوں کے لئے تیاریوں کو حتمی شکل دے دی گئی ہے۔ مقابلوں سے قبل اعلیٰ فوجی افسران کی موجودی میں فل ڈریس ریہرسل بھی کی گئی۔دوسری جانب ایونٹ میں شرکت کے لئے نیپال، برطانیہ اور قازقستان کی افواج کی ٹیمیں لاہور پہنچ گئی ہیں،جبکہ سری لنکا چین، اردن، سعودی عرب، ملائیشیا اور مالدیپ کے دستے پہلے ہی لاہور پہنچ چکے ہیں۔ ترجمان کے مطابق بحرین کی فوج کی ٹیم آج شب اور آسٹریلیا، امریکہ، ترکی، بنگلہ دیش اور انڈونیشیا کی ٹیمیں پیر کے روز لاہور پہنچیں گی۔