لاہور( این این آئی) تحریک انصاف کے وائس چیئرمین شا ہ محمود قریشی نے کہا ہے کہ کرپشن کیخلاف تحریک اپنے سیاسی یا ذاتی مفادات نہیں بلکہ ملک کے مستقبل کیلئے چلا رہے ہیں ،وزیر اعظم خود کو احتساب کے لئے پیش کرنے کا اعلان کر دیں احتجاج کی کال واپس لے لیں گے،ہماری کسی سے کوئی ناراضگی نہیں سب کو اسلام آباد کے احتجاج میں شرکت کی دعوت ہے اور جو بھی آئے گا اسے خوش آمدید کہیں گے ۔ ایک انٹر ویو میں شاہ محمود قریشی نے کہا کہ حکومت بتائے ہم نے ایسا کون سا غیر جمہوری طرز اپنایا ہے جس سے نظام کو کوئی خطرات لا حق ہوئے ہیں ۔کرپشن کے خلاف پر امن احتجاج کرنا ہمارا آئینی او رجمہوری حق ہے اور دنیا کی کوئی طاقت ہمیں اس سے دستبردار نہیں کرا سکتی۔ انہوں نے کہا کہ پی ٹی آئی اپنے سیاسی یا ذاتی مفادات کیلئے نہیں بلکہ کے مستقبل کیلئے کرپشن کے خلاف تحریک چلا رہی ہے اور انشا اللہ فتح عوام کی ہو گی ۔ انہوں نے کہا کہ اسلام آباد کے احتجاج کا مقصد صرف پانامہ لیکس کاشفاف احتساب کا عمل شروع کرانا ہے ۔ وزیر اعظم نوازشریف خود کو آج احتساب کیلئے پیش کرنے کا اعلان کردیں پی ٹی آئی اپنے احتجاج کی کال واپس لے لے گی لیکن بد قسمتی سے ایسا ہوتا ہوا دکھائی نہیں دیتا ۔ شاہ محمود قریشی نے کہا کہ کرپشن کے ناسور کو جڑ سے اکھاڑ پھینکنے کے لئے سب کو جدوجہد کرنا ہو گی وگرنہ ہماری آنے والی نسلیں بھی ہمیں معاف نہیں کریں گی۔