اسلام آباد(مانیٹرنگ ڈیسک) پاک بحریہ کے سربراہ ایڈمرل محمد ذکاء اللہ نے خبردار کیا ہے کہ بھارت کے مخاصمانہ رویے، جان بوجھ کر کی گئی اشتعال انگیزی یا اسٹریٹجک غلطی کی وجہ سے اگر کوئی ناخوشگوار صورتحال پیدا ہوئی تو پاکستان اس کا منہ توڑ جواب دے گا۔پاکستان ملٹری اکیڈمی میں 35 ویں گریجویٹ کورس کی پاسنگ آؤٹ پریڈ کی تقریب سے خطاب کرتے ہوئے چیف آف نیول اسٹاف ایڈمرل محمد ذکاء4 اللہ نے کہا کہ ’ہم پوری طاقت سے اور ہر قیمت پر ملک کی علاقائی سالمیت اور خودمختاری کا دفاع کریں گے‘۔انہوں نے کہا کہ ’ہماری تاریخ رہی ہے کہ ہم نے خطرات کا ڈٹ کر مقابلہ کیا اور سرخ رو بھی ہوئے، گزشتہ چند دہائیوں میں اس ملک نے جتنے چیلنجز کا سامنا کیا اس نے ہمیں مزید مضبوط اور لچکدار بنایا‘۔ان کا کہنا تھا کہ ملک سے دہشت گردی اور شدت پسندی کو جڑ سے ختم کرنے کے لیے قوم کا عزم غیر متزلزل ہے۔انہوں نے کہا کہ دہشت گردی کے خلاف آپریشن ضرب عضب تکمیل کے مراحل میں ہے جبکہ نیشنل ایکشن پلان پاکستانی قوم اور مسلح افواج کی دہشت گردی کو شکست دینے کے عزم کی مثال ہے۔بھارتی الزامات کو مسترد کرتے ہوئے انہوں نے کہا کہ پاکستان امن پسند ملک ہے اور اپنے تمام پڑوسیوں کے ساتھ پر امن تعلقات چاہتا ہے۔کشمیر میں بھارت کی جانب سے انسانی حقوق کی خلاف ورزیوں پر بات کرتے ہوئے انہوں نے کہا کہ ’جموں و کشمیر میں بھارتی فورسز کے مظالم سے من گھڑت کہانیاں بناکر توجہ نہیں ہٹائی جاسکتی اور نہ ہی اب دنیا کو گمراہ کیا جاسکتا ہے‘۔نیول چیف نے گریجویٹ ہونے والے کیڈٹس پر زور دیا کہ ان کی کوشش ہونی چاہیے کہ وہ اپنے کردار سے ضبط نفس اور استقامت کی مثالیں قائم کریں۔اس موقع پر پاکستان ملٹری اکیڈمی کے کمانڈنٹ میجر جنرل ندیم رضا، تینوں مسلح افواج کے سینئر افسران اور پاس ہونے والے کیڈٹس کے والدین بھی تقریب میں شریک تھے۔35 ویں گریجویٹ کورس کے بہترین کیڈٹ انڈر آفیسر عمر کو چیف آف آرمی اسٹاف کی چھڑی بھی بطور اعزاز دی گئی۔

موضوعات:نیول چیف