کراچی (این این آئی)فاروق ستار سمیت ان ایم کیو ایم رہنمائوں کر گرفتار کر لو،عدالت نے حکم جاری کر دیا،  کراچی میں انسداد دہشت گردی عدالت نے اشتعال انگیز تقریر کے 28 مقدمات کی سماعت میں بانی ایم کیوایم اور سربراہ ایم کیوایم پاکستان فاروق ستار سمیت دیگر رہنماؤں کے ایک بار پھر ناقابل ضمانت وارنٹ گرفتاری جاری کردئیے۔ ہفتہ کو عدالت نے 2 مقدمات میں پولیس فائل پیش نہ کرنے پر انسپکٹر عبدالواسع جوکھیو اور انسپکٹر اصغر سر ہندی کے بھی ناقابل ضمانت وارنٹ گرفتاری جاری کرتے ہوئے علاقہ ایس ایس پی کو دونوں افسران کو گرفتار کرکے پیش کرنے کا حکم دے دیا ہے۔دوران سماعت میئر کراچی وسیم اختر کے وکیل نے عدالت کو بتایا کہ مقدمے میں نامزد ملزمان فاروق ستار ، خالد مقبول صدیقی جیل سے باہر ہیں جبکہ ان کاموکل جیل کے اندر ہے جس پرعدالت نے وکیل سے سوال کیا کہ آپ کو ان کی آزادی پر اعتراض ہے ؟ آپ چاہتے ہیں کہ وہ بھی پکڑے جائیں ؟ جس پر وکیل نے عدالت کو بتایا کہ ان کی عدم گرفتاری پر نہیں وسیم اختر کے اندر رہنے پر اعتراض ہے ۔پولیس نے عدالت کو بتایا کہ بانی ایم کیوایم نے قومی سلامتی کے خلاف تقریر کرکے ضرب عضب اور کراچی آپریشن کو متاثر کرنے کی کوشش کی جس پر عدالت نے بانی ایم کیوایم ، فاروق ستار ، خالد مقبول صدیقی ، ریحان ہاشمی سمیت دیگر کے پھر ناقابل ضمانت وارنٹ گرفتار جاری کرکے ملزمان کو 12 نومبر کو گرفتار کرکے پیش کرنے کا حکم دیا۔یاد رہے کہ عدالت نے میئر کراچی وسیم اختر کی ایک مقدمے میں ضمانت کی درخواست پر فیصلہ محفوظ کیا ہوا ہے۔

یاد رہے کہ اس سے قبل ایم کیو ایم پاکستان نے اپنے تمام رہنماؤں کو بیرون ملک سے آنے والی کالز ریسیو کرنے سے منع کردیا تھا۔نجی ٹی وی چینل کے مطابق ایم کیو ایم پاکستان کے سربراہ ڈاکٹر فاروق ستار کی سربراہی میں ایم کیو ایم کا اہم ترین اجلاس ہوا۔ اجلاس میں ایم کیو ایم کی رابطہ کمیٹی ارکان اور پارلیمانی رہنماؤں سمیت مرکزی قیادت نے شرکت کی۔اجلاس میں یہ بات سامنے آئی کہ تمام ارکان کو بیرون ملک سے دھمکی آمیز کالز آنے کا سلسلہ جاری ہے جس پر ڈاکٹر فاروق ستار نے اراکین رابطہ کمیٹی سمیت دیگر تمام رہنماؤں کو غیر معروف نمبرز سے آنے والی اور چند معروف شخصیات کی بیرون ملک سے آنے والی کالز ریسیو کرنے سے منع کردیا۔