اسلام آباد(مانیٹرنگ ڈیسک) نیشنل سکیورٹی کمیٹی کے اجلاس کی اندرونی کہانی کیسے باہر آئی؟، وزیراعظم نوازشریف سے وفاقی وزیرداخلہ چوہدری نثارنے نور خان ائر بیس پر اہم ملاقات کی میں ڈان اخبار کی خبر کی انکوائری سے متعلق بریفنگ دی۔جبکہ اس معاملے کی انکوائری اب وفاقی وزیرداخلہ کودیدی گئی ۔ایک نجی ٹی وی کی رپورٹ کے مطابق وزیراعظم نوازشریف نے آزربائیجان روانگی سے قبل وفاقی وزیرداخلہ چوہدری نثارسے اہم مشاورت کی۔ نور خان ائربیس پر ہونے والی ملاقات میں سول قیادت نے امن و امان کی صورتحال پر مکمل اطمینان کا اظہا کیا۔ ملاقات میں انگریزی اخبار کی خبر کا معاملہ منطقی انجام تک پہنچانے کا عزم ظاہر کیا گیا۔ذرائع کا کہنا ہے کہ وزیر داخلہ نے وزیراعظم کو ڈان اخبار کے سب ایڈیٹر سیرل المیڈا کی شائع کی خبر کے حوالے سے کی جانے والی تحقیقات کی پیشرفت سے آگاہ کیا اور بتایا کہ آپ کی واپسی تک تحقیقات مکمل کر لی جائیں گی ۔وزیراعظم کا کہنا تھا کہ اس معاملے کو ہر حال میں منطقی انجام تک لے جایا جائے گا۔ اداروں میں تفریق کی سازش کے اصل محرکات کو بھی بے نقاب کیا جائے گا۔ملاقات میں ملک کی مجموعی سیکیورٹی صورتحال پر بھی مکمل اطمینان کا اظہار کیا گیا۔ وزیراعظم کا کہنا تھا کہ سیکورٹی کے موثر انتظامات کے باعث محرم پر امن رہا۔ سیکورٹی اداروں نے جانفشانی سے کام کیا۔واضح رہے کہ سیرل المیڈا نے وزیراعظم ہاؤس میں حساس نوعیت کے اجلاس سے متعلق خبرنشر کی تھی ۔ خبر کے سیاق و سباق سے متعلق وزیراعظم ہاؤس نے تردید کر دی تھی۔وزیراعظم نوازشریف نے اس موقع پرچوہدری نثارعلی خان کوکہاکہ اس خبرکولیک کرنے والے شخص کی جلدازجلد نشاندہی کےلئے تحقیقات کی جائیں تاکہ متعلقہ شخص کےخلاف سخت کارروائی کی جاسکے ۔

موضوعات:سیرل المیڈا وزیراعظم وفاقی وزیرداخلہ