اسلام آباد (مانیٹرنگ ڈیسک) لائن آف کنڑول پربھارت کی طرف سے دراندازی گزشتہ روزکی گئی جس کے نتیجے میں 2پاکستانی فوجی شہیدہوئے تھے جبکہ پاک فوج کی جوابی کارروائی پربھارتی فوج اپنے مرنے والے فوجیوں کی لاشیں چھوڑکربھاگ گئی تھی ۔تفصیلات کے مطابق بھارتی فوج نے کل رات اندھیرے میں کنٹرول لائن 4مقامات سے عبور کرنے کی کوشش کی جسے نہ صرف ناکام بنا دیا گیا بلکہ حملہ آوروں کو ان کے اپنے علاقے میں ہی تباہ و برباد کر دیا گیا اور پاک فوج کے منہ توڑ جوابی ایکشن کی تاب نہ لا کر نعشیں چھوڑ کر گیدڑوں کی طرح بھاگ کھڑے ہوئے۔ ان خیالات کا اظہار کنٹرول لائن پر مختلف سیکٹرز میں تعینات پاکستانی کمانڈروں نے گفتگو میں کیا۔ایک معروف انگریزی جریدے ”نیشن“ کی رپورٹ کے مطابق کمانڈروں نے بتایا کہ بھارتی جارحیت کے خلاف ہمارا جواب بڑا نپا تلا تھا اور ان کا یہ دعویٰ سفید جھوٹ ہے کہ سرجیکل سٹرائیک کی گئی اور کنٹرول لائن عبور کر کے اہداف کو نشانہ بنایا گیا۔ حقیقت یہ ہے کہ ہم کئی روز سے بھارتیوں کا انتظار کر رہے تھے۔ انہیں آگے بڑھتے ہوئے ہم نے ان کے علاقہ میں ہی دیکھ لیا تھا اور وہیں روک دیا۔ ایک کمانڈر نے بتایا کہ میری کمپنی پر حملہ کیا گیا اللہ کے فضل وکرم سے ہم نے بھرپور جواب دیا اور حملہ آوروں کو ان کے علاقے میں دھکیل دیا۔ دشمن6 نعشیں چھوڑ کر بھاگ کھڑا ہوا۔ ہمارا صرف ایک جوان مارٹر گولے سے شہید ہوا۔ دوسرے کمانڈر نے بتایا کہ بھارت کی طرف سے سرجیکل سٹرائیک کا دعویٰ جھوٹا ہے اور بھارت اس کی جرات ہی نہیں کرسکتا ۔ کل رات وہ ٹھیک طریقے سے کنٹرول لائن کی خلاف ورزی بھی نہیں کرسکا۔ بھارتیوں نے چار مقامات سے کنٹرول لائن عبور کرنے کی کوشش کی۔ میرے علاقے میں انہیں ان کے علاقہ میں 1500 میٹر دور ہی دیکھ لیا گیا اور فائر کھول دیا۔ بھارتی دندان شکن جواب کی تاب نہ لا کر دم دبا کر بھاگ گئے۔دوسرے سیکٹر میں بھی بھارتیوں کو کنٹرول لائن کے اس پار ہی دیکھ لیا گیا تھا جہاں سے انہوں نے آگے بڑھنا ترک کردیا اور فائرنگ شروع کردی۔ جب جواب دیا گیا تو وہ افراتفری کے عالم میں گیدڑوں کی طرح بھاگ کھڑے ہوئے۔ ہمارا جانی نقصان مارٹر گولوں کی وجہ سے ہوا۔ چھمب کے کمانڈر نے بتایا کہ بھارتی کچھ بھی نہیں کرسکے۔ وہ لائن عبور کرنا چاہتے تھے مگر ہم نے انہیں ان کے علاقے میں ہی دیکھ لیا اور فائرنگ کی زد میں لے لیا اور وہ سب ہی نعشیں چھوڑ کر فرار ہوگئے۔ نعشیں ان کے علاقے میں پڑی دیکھی جاسکتی ہیں۔ ہمارے جوان مارٹر گولے لگنے سے جام شہادت نوش کرگئے۔ ایک بھارتی فوجی بھی ہماری سرزمین پر قدم رکھنے کی بھی جرات نہیں کرسکا۔ تتہ پانی کے بالمقابل بھارتی سائیڈ پر8 لاشیں پڑی ہیں جہاں سے وہ انہیں اٹھا سکتے ہیں۔ جب ہم ان کی کرتوت کا ناقابل تردید ثبوت پیش کریں گے تو وہ شرم سے ڈوب مریں گے۔واضح رہے کہ بھارتی فوجیوں کی لاشیں ابھی وہیں پڑی ہیں لیکن مودی سرکاراورانڈین آرمی نے ان کواٹھانے کے بارے میں کیافیصلہ کیاوہ ابھی تک سامنے نہیں آسکاجس کی وجہ سے بھارتی فوج کی بزدلی سامنے آگئی ۔