اسلام آباد(مانیٹرنگ ڈیسک) نجی ٹی وی پروگرام میں سینئر تجزیہ نگار نے وڈیو چلا کر تہلکہ مچا دیا۔ تفصیل کے مطابق نجی ٹی وی پروگرام میں گفتگو کرتے ہوئے سینئر تجزیہ نگار نے کہا کہ ایک طرف ایم کیو ایم نے الطاف حسین سے مکمل طور پر لاتعلقی کا اعلان کر دیا ہے لیکن دوسری جانب صرف چند دن قبل ہی وسیم اختر نے متحدہ کے تنظیمی عہدیداران کا حلف الطاف حسین کے نام پر ہی لیا ہے۔
سینئر تجزیہ نگار ارشد شریف نے نجی ٹی وی پروگرام میں وسیم اختر کی حلف برداری کی وڈیو چلا دی جس میں حلف کا متن یہ تھا کہ ’’میں قائد تحریک الطاف حسین کو یقین دلاتا ہوں کہ میں عوام کے ساتھ زبان، جنس، مسلک ، مذہب، فرقہ ، فقہ، علاقہ اور سماجی حیثیت کے امتیاز کے بغیر کام کروں گا‘‘۔ نجی ٹی وی پروگرام میں سینئر تجزیہ نگار ارشد شریف نے کہا کہ حلف کی تقریب میں وسیم اختر عوام کے سامنے کہہ رہے ہیں کہ میں کسی قابل نہیں ہوں اور نہ ہی میں نے کوئی کام کیا ہے، میں جو کچھ بھی ہوں وہ قائد کی وجہ سے ہوں۔ ارشد شریف نے کہا کہ کیا حلف کو تبدیل کیا جا سکتا ہے؟ وسیم اختر سمیت تمام ایم کیو ایم رہنماؤں نے الطاف حسین سے وفاداری کے حلف اٹھا رکھے ہیں۔

موضوعات:الطاف حسین