اسلام آباد (مانیٹرنگ ڈیسک ) پاکستان چین دوستی کی ایک اور اہم مثال سامنے آگئی ،کراچی میں چینی کمپنی کا تیار کردہ شپنگ ٹرمینل تکمیل کے قریب ہے جہاں بڑے بحری جہازوں کی رسائی ممکن ہو گی۔ذرائع کے مطابق پاکستان کے تجارتی حب کراچی میں بننے والا یہ ہیچیسن ٹرمینل اس سال کے اختتام سے قبل ہی کام شروع کر دے گا۔ کراچی پورٹ ٹرسٹ کے ساتھ کیے گئے معاہدے کے مطابق چینی کمپنی یہاں سرمایہ کاری کرے گی۔یہ منصوبہ چین کے اقتصادی راہداری کے تحت پاکستان میں توانائی اور سڑکوں کی تعمیر کے لیے 46 ارب ڈالر کے منصوبوں کا حصہ ہے۔کراچی پورٹ ٹرسٹ کے مطابق زیادہ تر کام مکمل ہو چکا ہے۔ باقی ماندہ پر کام جاری ہے اور افتتاح سے قبل روڈ بھی مکمل کر لیا جائے گا۔اس بارے میں کاروباری افراد نے کہا ہے کہ بندرگاہ کے گرد سڑکیں اور رابطے کا نظام بہتر بنانے کی ضرورت ہے۔سرکاری خبررساں ادارے کے مطابق مال برداری کی کمپنی کے چیف ایگزیکٹیو نے کہا کہ پاکستان بہت عرصے سے پیچھے رہ گیا تھا لیکن اب اس نئے ٹرمینل کے قیام کے بعد ہمیں آگے بڑھنے کا موقع ملے گا۔پاکستان کی مجموعی تجارت کا نصف جہازوں سے لایا یا لے جایا جاتا ہے۔واضح راہے کہ پاکستان کی بندرگاہ پر اس وقت 20 فٹ کے 10 لاکھ کنٹرنرز کو ہینڈل کیا جاتا ہے۔امکان ظاہر کیا جارہاہے کہ رواں برس اکتوبر میں ہیچیسن کے نئے ٹرمینل پر کام کا آغاز ہو جائے گا اور اندازے کے مطابق پہلے برس ڈھائی لاکھ یونٹس ہینڈل کیے جائیں گے۔

موضوعات:پاک چین دوستی