اسلام آباد(نیوز ڈیسک)سٹیٹ بینک نے نئی مانیٹری پالیسی کا اعلان کر دیا۔اسٹیٹ بینک نے اگلے 2 ماہ کیلئے شرح سود اعشاریہ 5 فیصد کم کرکے 6 فیصد کردی۔ تفصیلات کے مطابق سٹیٹ بینک نے اگلے دو ماہ کیلئے مانیٹری پالیسی کا اعلان کرتے ہوئے بنیادی شرح سود یا پالیسی ریٹ 6اعشاریہ 5 فیصد سے کم کرکے 6 فیصد کردی ہے۔ مانیٹری پالیسی اعلامیہ میں مرکزی بینک کا کہنا ہے کہ امن و امان میں بہتری کے علاوہ پاک چین اقتصادی راہداری بننے سے سرمایہ کاری کا ماحول مزید بہتر ہوگا، مستقبل میں بڑی صنعتوں کی پیداوار اور زرمبادلہ ذخائر میں مزید بہتری کی امید ہے۔اسٹیٹ بینک نے واضح کیا ہے کہ برآمدات اور سرمایہ کاری میں اضافہ کرنا معیشت کیلئے انتہائی ضروری ہے۔ ملک میں مہنگائی کم ہوئی ہے تاہم بجلی پر سبسڈی کے خاتمے سے مہنگائی بڑھنے کا خطرہ موجود ہے۔بنیادی شرح سود کم ہونے سے جہاں کراچی اسٹاک ایکس چینج کو تقویت ملے گی، صنعتوں اور عام افراد کو سستا قرض ملے گا وہیں بینک اکاونٹس پر منافع بھی کم ہوجائے گا۔