اسلام آباد(نیوز ڈیسک) بلوچ کالعدم مزاحمتی تنظیموں کے کمانڈروں شکاری مری اور مدینہ مری نے کوئٹہ میں نواب جنگیز مری کی رہائش گاہ پر اپنے ساتھیوں سمیت ہتھیار ڈال دیئے۔ ان کا کہنا ہے کہ بھارتی تنظیمیں بلوچ نوجوانوں کو ورغلا رہی ہیں۔ مری قبیلے کے سربراہ نواب جنگیز مری کی رہائش گاہ پر پریس کانفرنس سے خطاب کرتے ہوئے رکن اسمبلی نواب جنگیز مری کا کہنا تھا کہ پاکستان ہمارا وطن ہے اس کی ترقی اور خوشحالی کے لیے بلوچ مزاحمت کار قومی دھارے کی سیاست میں شامل ہو کر اپنا کردار ادا کریں۔ صوبائی وزیر داخلہ میر سرفراز بگٹی کا کہنا تھاکہ انڈین فنڈیڈ تنظیمیں بعض بلوچ نوجوانوں کو ورغلا کر اپنے مذموم مقاصد حاصل کرنا چاہتے ہیں انکی یہ سازش کسی طور پر بھی کامیاب نہیں ہو گی۔ ہتھیار ڈالنے والے کمانڈر دین محمد عرف شکاری مری کا کہنا تھا کہ کئی سالوں سے بلوچستان کی آزادی نام نہاد جدوجہد کا حصہ تھے لیکن اب سمجھ آ گئی پاکستان ہی ہمارا وطن ہے اسی میں رہ کر روکھی سوکھی کھا کر اپنا بچوں کا پیٹ پال لینگے۔ ہتھیار ڈالنے والے کمانڈر شکاری اور مدینہ مری کے گروپ کے ہمراہ 45 مزاحمت کاروں نے اپنے ہتھیار نواب جنگیز مری کے سامنے پیش کئے اور آئندہ سے پر امن جدوجہد کا اعادہ کیا۔