اسلام آباد(نیوزڈیسک)شفقت حسین کی سزائے موت کامعاملہ،سپریم کورٹ نے تردید کردی،سپریم کورٹ آف پاکستان کے چیف جسٹس مسٹر جسٹس ناصر الملک نے شفقت حسین کی سزائے موت پر عمل درآمد سے متعلق رپورٹ طلب کرلی ہے۔ گزشتہ روز چیف جسٹس ناصر الملک کی سربراہی میں سپریم کورٹ کے 3 رکنی بینچ نے شفقت حسین کے ڈیتھ وارنٹ کے خلاف اپیل کی سماعت کی۔ اس دوران مجرم کے وکیل ڈاکٹر طارق نے عدالت کو بتایا کہ ان کے موکل کو آج پھانسی دی جانی تھی تاہم انہیں اخبارات کے ذریعے معلوم ہوا کہ اس کی سزا پر عمل روک دیا گیا ہے جس پرجسٹس ناصر الملک نے ریمارکس دیئے کہ شفقت حسین کی پھانسی روکنے کے حوالے سے عدالت نے کوئی حکم نامہ جاری نہیں کیا۔عدالت نے سماعت بدھ تک ملتوی کرتے ہوئے حکم دیا کہ (آج) بدھ تک معلوم کیا جائے درخواست گزارزندہ ہے یا نہیں۔واضح رہے کہ شفقت حسین کو 2004 میں 7 سالہ بچے کو اغوا کے بعد قتل کے الزام میں سزائے موت سنائی گئی تھی،سانحہ پشاور کے بعد اس کا نام اس فہرست میں شامل تھا جنھیں سب سے پہلے پھانسی دی جانی تھی تاہم شفقت کی پھانسی 4 مرتبہ ملتوی ہوچکی ہے۔