کوئٹہ (نیوزڈیسک )سپیکر بلوچستان جان محمد جمالی نے اپنے عہدے سے استعفیٰ دے دیا جسے صوبے کے قائم مقام گورنر نے منظور کرلیا۔ بلوچستان اسمبلی کی صوبائی کابینہ کی جانب سے اسپیکر میرجان محمد جمالی کے خلاف تحریک عدم اعتماد لانے کافیصلہ کیا گیا جس کے بعد جان محمد جمالی نے تحریک پیش ہونے سے قبل ہی اپنے عہدے سے مستعفی ہوگئے۔ ذرائع کے مطابق جان محمد جمالی نے ہاتھ سے تحریری کردہ اپنا استعفیٰ گورنر ہاوس ارسال کیا جسے قائم مقام گورنر عبدالقدوس بزنجو نے منظور کرلیا۔ذرائع کا کہنا ہے کہ جان محمد جمالی کے مستعفی ہونے کے بعد مسلم لیگ (ن) کی قیادت نئے اسپیکر کے لیے مختلف ناموں پر غور کررہی ہے۔واضح رہے سینیٹ الیکشن میں پارٹی ڈسپلن کی خلاف ورزی کے بعد جان محمد جمالی کے خلاف ایکشن لیا گیا جب کہ سابق اسپیکر کے قریبی ساتھیوں کے مطابق انہوں نے مسلم لیگ (ن) کی قیادت سے اختلافات پر استعفیٰ دیا۔