اسلام آباد(نیوز ڈیسک) این اے 246 کراچی میں بعض پولنگ سٹیشنوں پر شدید بدانتظامی دیکھنے میں آئی ، لمبی لمبی قطاروں کے باوجود ووٹرز کو پولنگ سٹیشن کے اندر نہیں جانے دیا گیا ، جبکہ لیاقت آباد میں نئے شناختی کارڈ کے ٹوکن پر ووٹ ڈالنے کی اجازت نہ ملنے پر شہریوں نے الیکشن کمیشن کے خلاف شدید احتجاج کیا۔ قومی اسمبلی کے حلقے این اے 246 میں کئی پولنگ سٹیشنز پرعملہ نہ پہنچنے کے باعث ووٹنگ کا عمل تاخیر سے شروع ہوا۔ بوتھ کی تعداد کم ہونے سے پولنگ کی رفتار سست رہی جبکہ متعدد ووٹرز کو اپنے پولنگ سٹیشنز کی تلاش میں بھی مشکلات کا سامنا کرنا پڑا۔ لیاقت آباد نمبر 4 میں نئے شناختی کارڈز نہ ہونے پر کئی شہریوں کو ووٹ کاسٹ کرنے سے روک دیا گیا جس پر ووٹرز نے الیکشن کمیشن کے خلاف شدید احتجاج کرتے ہوئے نعرے بازی کی۔ شہریوں نے شکایت کی کہ انہیں نئے شناختی کارڈز نہیں ملے ، ٹوکن پر ووٹ نہیں ڈالنے دیا جا رہا۔ عزیز آباد اور فیڈرل بی ایریا میں بھی ووٹرز کوشدید مشکلات کا سامنا رہا۔ بعض ووٹرز نے شکایت کی کہ وہ کئی سال سے اس علاقے میں مقیم ہیں۔ الیکشن 2013 میں ووٹ کاسٹ کر چکے ہیں جبکہ اس بار فہرستوں میں ان کے نام درج نہیں۔ ادھر لیڈیز انڈسٹریل ہوم ایف سی ایریا کے پولنگ سٹیشن میں بدنظمی دیکھنے میں آئی۔ ووٹرز کا کہنا تھا کہ طویل قطار کے باوجود انہیں پولنگ سٹیشن کے اندر نہیں جانے دیا جا رہا۔
مزید پڑھئے:سبق مفت میں نہیں ملتا……..!!!
دوسری جانب ڈی جی رینجرز نے این اے دو سو چھیالیس کے ریٹرننگ افسر سے ملاقات کی اور پولنگ کے انتظامات کا جائزہ لیا۔
