اسلام آباد(نیوز ڈیسک) عام انتخابات میں دھاندلی کی تحقیقات کرنے والے جوڈیشل کمیشن میں سیاسی جماعتوں اور شخصیات کی طرف سے شکایات ، شواہد جمع کرانے تاریخ ختم ہوگئی پاکستان پیپلز پارٹی اور مہاجر قومی موومنٹ نے اپنی اضافی معروضات کمیشن میں جمع کرا دیں ۔ جوڈیشل کمیشن نے سولہ اپریل کو سماعت کے دوران پی پی پی اور دیگر جماعتوں کو مزید ثبوت جمع کرانے کےلئے ایک ہفتہ کی مہلت دیتے ہوئے سماعت 23 اپریل تک ملتوی کر دی تھی ۔ پیپلز پارٹی کی طرف سے سندھ اسمبلی کے حلقہ 85 سے متعلق فیکٹ فائنڈنگ رپورٹ جمع کرائی گئی ، اس حلقہ سے سسی پلیجو کو شکست ہوئی تھی اور انہوں نے شکست کی ذمہ داری ریٹرننگ افسر پر عائد کی تھی ، ان کا الزام تھا کہ مخالف امیدوار نے سید عامر حیدر شاہ شیرازی نے ریٹرننگ افسر سے ساز باز کر کے جیت کو ہار میں تبدیل کیا جبکہ مہاجر قومی موومنٹ کی طرف سے کراچی کے حوالہ سے معروضات جمع کرائی گئی ہیں اور موقف اختیار کیا گیا کہ کراچی میں انتخابات کا نتیجہ منظم دھاندلی کی عکاسی کرتا ہے ۔ سیکرٹری الیکشن کمیشن نے بھی کراچی میں دھاندلی کا اعتراف کیا ، کراچی انتخابات کے دوران ایم کیو ایم کی جانب سے طاقت کا استعمال کیا گیا ، ایم کیو ایم کے طاقت کے استعمال کی وجہ سے دو افراد کی ہلاکت اور کئی افراد زخمی ہوئے ۔