اسلام آباد(نیوز ڈیسک)کراچی میں متحدہ قومی موومنٹ (ایم کیو ایم) کے مرکز نائن زیرو میں بدھ کو رینجرز کی جانب سے سرچ آپریشن کیا گیا۔کراچی میں بدھ کو صبح سویرے رینجرز کی بھاری نفری نے ایم کیوایم کے مرکزنائن زیرواوراطراف کے مکانوں پر چھاپہ مارا اور متحدہ کے رہنماو¿ں عامر خان، عبدالحسیب ، ڈاکٹر سلیم دانش، ارشد حسین، ڈاکٹرایوب شیخ اور رکن سندھ اسمبلی ریحان ظفر سمیت متعدد کارکنوں کوحراست میں لیا گیا تھا جن میں اکثر کو بعد ازاں چھوڑ دیا گیا۔رابطہ کیمٹی کے رکن عامر خان کو رینجرز اہلکار اپنے ہمراہ لے گئے جن سے تفتیش کی جائے گی۔نائن زیرو کے تمام شعبہ جات کی تلاشی کے دوران دفتری ریکارڈ بھی قبضے میں لینے کی اطلاعات ہیں۔آپریشن کے دوران رینجرز کی جانب سے نائن زیرو سے اسلحہ برآمد کرنے کا دعویٰ کیا گیا۔سندھ رینجرز کے ترجمان کرنل طاہر کا کہنا تھا کہ نائن زیرو میں کارروائی خفیہ اطلاع کی بنیاد پر کی گئی اورخورشید بیگم میموریل ہال کو سیل کردیا گیا۔ان کا کہنا تھا کہ نائن زیرو کی طرف 21 راستے آتے ہیں، ان تمام کو بیرئیر لگا کر بند کیا گیا ہے، جو ‘نو گو ایریا’ کے زمرے میں آتا ہے اور رینجرز کو اختیار حاصل ہے کہ وہ نوگو ایریاز کا خاتمہ کرے۔کرنل طاہر نے مزید کہا کہ ایم کیو ایم کے مرکز سے نیٹو کنٹینرز سے چوری ہونے والا اسلحہ برآمد ہوا ہے، جو ایک سوالیہ نشان ہے۔ان کا کہنا تھا کہ خفیہ اطلاع پر چھاپے کے دوران جرائم پیشہ افراد کو حراست میں لیا گیا ہے جبکہ ایم کیو ایم رہنما عامر خان کو ساتھ رکھا گیا ہے، ان کو حراست میں نہیں لیا گیا، البتہ جرائم پیشہ افراد ان کے ہمراہ موجود تھے اس لیے ان سے پوچھ گچھ کی جائے گی۔دوسری جانب رینجرز کے مطابق کسی بھی رکن اسمبلی کو حراست میں نہیں لیا گیا۔انہوں نے ٹرانسپورٹرز سے کہا کہ وہ سڑکوں پر اپنی گاڑیاں لے کر آ سکتے ہیں کیونکہ کسی کو بھی نقص امن کی اجازت نہیں دی جائے گی۔رینجرز کی کارروائی پر ردعمل ظاہر کرتے ہوئے متحدہ قومی موومنٹ نے نائن زیرو پر چھاپے کے خلاف ملک بھر میں احتجاج کا اعلان کردیا۔ایم کیو ایم کی رابطہ کمیٹی نے تاجروں اور ٹرانسپورٹرز سے کاروبار بند رکھنے اور گاڑیاں سڑکوں پر نہ نکالنے کی اپیل کی۔نائن زیرو پر آپریشن کی اطلاع کے بعد ایم کیو ایم کے کئی رہنما عزیزآباد پہنچے لیکن انہیں آگے جانے کی اجازت نہیں دی گئی۔نائن زیرو پر چھاپے کے بارے میں ایم کیوایم کے مرکزی رہنما ڈاکٹر فاروق ستار کا کہنا ہے کہ اس کارروائی سے بہت صدمہ ہوا ہے، متحدہ نے ہمیشہ قانون کی پاسداری کی ہے اور نائن زیرو پر اس طرح کا آپریشن تشویشناک ہے۔ایم کیو ایم کے ایک اور رہنماءمصطفیٰ عزیزآبادی کا کہنا تھا کہ نائن زیروپر چھاپہ مارکرلوگوں کو مشتعل کرنے کی کوشش کی گئی۔ایم کیو ایم کے ترجمان کے مطابق رینجرز کی جانب سے الطاف حسین کی رہائش گاہ پر چھاپہ مارا گیا۔نائن زیرو پر چھاپے کی اطلاع کے بعد ایم کیو ایم کے کارکنان کی بڑی تعداد مکا چوک پر پہنچ گئی اور رینجرز کی سیکیورٹی کا حصار توڑ کر نائن زیرو پہنچنے کی کوشش کی۔ایم کیو ایم کے کارکنان کی ہنگامہ آرائی اور سکیورٹی حصار توڑنے پر رینجرز کی جانب سے ہوائی فائرنگ کی گئی۔بعد ازاں ایم کیو ایم کے کارکنان کی شدید ہنگامہ آرائی کے باعث رینجرز کی نفری نائن زیرو سے نکل کر عائشہ منزل کی جانب چلی گئی۔اس دوران نامعلوم افراد کی فائرنگ سے ایم کیو ایم کا ایک کارکن بھی زخمی ہوا جو بعد ازاں دم توڑ گیا۔ایم کیو ایم نے الزام لگایا ہے کہ مرکزی میڈیا سیل کا کارکن وقاص شاہ رینجرز کی فائرنگ سے ہلاک ہوئے ہیں تاہم رینجرز ترجمان نے اس کی تردید کی ہے اور کہا ہے کہ رینجرز کی فائرنگ سے کوئی بھی شخص ہلاک نہیں ہوا ہے ۔مشتعل افراد کی ہنگامہ آرائی کے باعث پولیس اور رینجرز کی جانب سے قانونی کارروائی بھی مکمل نہ کی جا سکی، کیونکہ پولیس نے نائن زیرو کے خورشید بیگم میموریل ہال کو سیل کیا جانا تھا مگر متحدہ قومی موومنٹ کے کارکنان نے سکیورٹی اداروں کو قانونی کارروائی پوری کرنے نہیں دی۔رینجرز کی جانب سے جاری کیے گئے اعلامیے کے مطابق نائن زیرو سے فیصل موٹا، عبید، نادرشاہ اور فرحان شبیر کو گرفتار کیا گیا ہے۔رینجرز ترجمان کے مطابق فیصل موٹا نجی ٹی وی کے رپورٹر ولی خان بابر کے قتل کیس کا مرکزی ملزم ہے۔نائن زیرو پر چھاپے کے بعد ایم کیو ایم کے رکن سندھ اسمبلی فیصل سبز واری نے میڈیا سے گفتگو میں کہا کہ رینجرز اہلکاروں نے لائسنس یافتہ اسلحہ میڈیا کو دکھایا جبکہ وہ اسلحہ اپنی حفاظت کے لیے رکھا گیا تھا۔ان کا کہنا تھا کہ معصوم لوگوں کا خون جمہوریت کا خون ہے، جبکہ رینجرز کی فائرنگ سے ہلاک ہونے والے کارکن وقاص شاہ کا جنازہ آج نہیں اٹھائیں گے۔انہوں نے نواز شریف کو مخاطب کرتے ہوئے کہا کہ وزیراعظم صاحب کراچی کو سڑک نہیں، یہاں بسنے والے لوگ چاہے ہیں۔انہوں نے کہا کہ اگر کسی پرالزامات ہیں تو عدالتوں میں پیش کیا جائے، ہمارے درجنوں کارکنوں کو حراست میں لیا گیا ہے، جبکہ رینجرز کے چھاپے کے دوران ہماری جانب سے کوئی مزاحمت نہیں کی گئی۔ایم کیو ایم کے قائد الطاف حسین نے نائن زیرو اور اطراف میں گھروں پر چھاپے اور گرفتاریوں کی مذمت کرتے ہوئے کہا کہ تلاشی کے نام پر دہشت گردی کے عمل کو فی الفور رکوایا جائے۔الطاف حسین نے عوام سے اپنے جذبات قابومیں رکھنے اور پر امن رہنے کی اپیل کی۔ایم کیو ایم کے مرکزی دفتر نائن زیرو پر چھاپے کے بعد رابطہ کمیٹی نے احتجاج کی اپیل کی تھی اور کاروبار بند رکھنے کا کہا گیا تھا جس پر کراچی کی مرکزی مارکیٹس اور بازاز بند ہو گئے۔عزیز آباد اور اطراف کے علاقوں میں صبح سے ہی کسی قسم کی کاروباری سرگرمیاں شروع نہ ہو سکی تھی۔کراچی کے مختلف علاقوں میں پیٹرول پمپس اور سی این جی اسٹیشنز بھی بند کر دیئے گئے۔ احتجاج کے اعلان کے بعد پرائیوٹ اسکولز ایسوسی ایشن نے شہر میں اسکول بند رکھنے کا اعلان کیا۔اسکولوں کی بندش سے بدھ کے روز ہونے والے امتحانات ملتوی کر دئیے گئے۔جامعہ کراچی میں بھی تدریسی عمل معطل کر دیا گیا جبکہ امتحانات بھی ملتوی کر دیئے گئے ہیں۔ایم کیو ایم کے مرکز پر چھاپے کے بعد اندرون سندھ بھی مختلف شہروں میں احتجاج کیا گیا۔حیدر آباد میں اہم مارکیٹس صبح ہی سے بند تھیں۔جامشورو میں سڑکوں پر ٹریفک معمول سے کم تھا البتہ تعلیمی اداروں میں سرگرمیاں معمول کے مطابق جاری رہیں۔سید قائم علی شاہ نے ایم کیو ایم کے مرکز نائن زیرو پر چھاپے کی رپورٹ طلب کر لی ہے۔وزیر اعلیٰ سندھ نے ڈی جی رینجرز سے چھاپے کی رپورٹ طلب کی ہے۔قائم علی شاہ نے آئی جی سندھ غلام حیدر جمالی سے بھی رابطہ کیا۔شہر میں ہونے والے احتجاج پر انہوں نے کہا کہ شہریوں کی جان ومال کے تحفظ کو یقینی بنایا جائے۔انہوں امن و امان کی صورتحال برقرار رکھنے کی ہدایت کی۔وزیر اعلیٰ نے ایم کیو ایم کے کارکن کی ہلاکت پر افسوس کا ا اظہار کیا ہے۔