اسلام آباد(نیوز ڈیسک) مصر کے قدیم بادشاہوں سے متعلق ایک پراسرار معاملے نے جدید سائنسی تحقیق کے بعد نئی شکل اختیار کرلی ہے۔

ماہرین نے تقریباً پانچ ہزار سال پرانی انسانی کھوپڑیوں کا جدید فرانزک طریقوں سے دوبارہ جائزہ لیا، جس کے دوران اہم شواہد سامنے آئے۔آثارِ قدیمہ کے ماہرین کے مطابق نئی ٹیکنالوجی نے ان باقیات پر موجود ایسے نشانات کی نشاندہی ممکن بنائی جو ابتدائی تحقیقات کے دوران واضح نہیں ہو سکے تھے۔محققین نے مصر کے شہر ابیڈوس میں پہلی سلطنت سے تعلق رکھنے والے تین حکمرانوں کے مقبروں سے برآمد ہونے والی انسانی باقیات کا دوبارہ معائنہ کیا۔ تحقیق کے دوران متعدد کھوپڑیوں پر سر پر لگنے والی شدید ضربوں کے آثار پائے گئے۔ماہرین کا خیال ہے کہ یہ شواہد اس امکان کو تقویت دیتے ہیں کہ شاہی مقبروں میں حکمرانوں کے ساتھ دفن کیے جانے والے بعض خادموں کو ان کی موت کے وقت قتل کیا گیا تھا، تاکہ وہ بعد از مرگ بھی اپنے بادشاہ کی خدمت کیلئے موجود رہیں۔

یہ باقیات تقریباً ایک صدی قبل، 1920 کی دہائی میں دریافت ہوئی تھیں اور اس وقت برطانیہ کی یونیورسٹی آف کیمبرج کے ڈک ورتھ کلیکشنز میں محفوظ ہیں۔پرڈیو یونیورسٹی سے وابستہ ڈاکٹر روزلین کیمبل کے مطابق ’ریٹینر قربانی‘ انسانی قربانی کی ایک مخصوص شکل تھی، جس میں حکمران کے قریبی افراد کو اس کی موت کے موقع پر قتل کردیا جاتا تھا۔ابتدائی طور پر جب ان افراد کی باقیات قبروں سے برآمد ہوئیں تو محققین نے انسانی قربانی کے امکان پر غور کیا تھا، تاہم اس وقت کھوپڑیوں پر جان بوجھ کر پہنچائے گئے زخموں کے واضح شواہد دستیاب نہیں تھے۔بعد میں جدید فرانزک تکنیکوں کے ذریعے 46 کھوپڑیوں کا دوبارہ تجزیہ کیا گیا، جن میں سے 18 پر ممکنہ طور پر جان لیوا سر کی چوٹوں کے آثار سامنے آئے۔ ان میں کھوپڑی کے فریکچر بھی شامل تھے، جبکہ ایک کھوپڑی پر آنکھ کے قریب کسی تیز دھار شے سے لگنے والے کٹ کا نشان بھی دریافت ہوا۔ماہرین کے مطابق یہ نتائج قدیم مصر میں شاہی تدفین، انسانی قربانی اور حکمرانوں کے ساتھ خادموں کو دفن کرنے کی روایات کے بارے میں مزید تحقیق کیلئے اہم بنیاد فراہم کر سکتے ہیں۔