اسلام آباد (نیوز ڈ یسک)یوٹیوب نے رواں برس مصنوعی ذہانت کے ذریعے تیار کیے گئے غیر معیاری اور بار بار دہرائے جانے والے مواد کے خلاف اقدامات کرتے ہوئے 16 نمایاں اے آئی چینلز کو پلیٹ فارم سے ہٹا دیا ہے۔ اس اقدام کا مقصد صارفین کو بہتر معیار کا مواد فراہم کرنا اور خودکار اسپیم چینلز کے پھیلاؤ کو روکنا ہے۔

آن لائن ویڈیو پلیٹ فارم کیپ وِنگ (Kapwing) کی حالیہ رپورٹ کے مطابق حذف کیے گئے ان چینلز کے مجموعی ویوز 4 ارب 70 کروڑ سے تجاوز کر چکے تھے جبکہ ان کے سبسکرائبرز کی تعداد 3 کروڑ 50 لاکھ سے زیادہ تھی۔ رپورٹ میں بتایا گیا کہ یہ اکاؤنٹس زیادہ تر مصنوعی آوازوں، بار بار استعمال ہونے والی ویڈیو کلپس اور ایک ہی نوعیت کے موضوعات پر مبنی مواد اپ لوڈ کر رہے تھے۔کیپ وِنگ نے نومبر 2025 میں پہلی مرتبہ ایسے چینلز کی نشاندہی کی تھی اور اے آئی سے چلنے والے کم معیار کے سب سے زیادہ سبسکرائب شدہ 100 اکاؤنٹس کی فہرست شائع کی تھی۔ بعد ازاں اس فہرست میں شامل 16 چینلز کو یا تو مکمل طور پر ڈیلیٹ کر دیا گیا یا ان کی تمام ویڈیوز ہٹا دی گئیں۔تخمینوں کے مطابق یہ چینلز سالانہ تقریباً ایک کروڑ ڈالر کی آمدن حاصل کر رہے تھے۔ ان میں اینی میٹڈ نقل شدہ مواد، مذہبی کہانیوں کے تسلسل پر مبنی ویڈیوز اور وائرل انداز کی خودکار ویڈیوز بنانے والے اکاؤنٹس شامل تھے۔

چند چینلز اب بھی یوٹیوب پر موجود ہیں، تاہم ان پر کوئی مواد دستیاب نہیں، جو اس بات کی نشاندہی کرتا ہے کہ کارروائی مخصوص ویڈیوز کے خلاف کی گئی ہے۔واضح رہے کہ رواں ماہ کے آغاز میں یوٹیوب کے چیف ایگزیکٹو نیل موہن نے اعلان کیا تھا کہ پلیٹ فارم پر دہرائے جانے والے، کم محنت سے تیار کیے گئے اور گمراہ کن اے آئی مواد کے خلاف پالیسی مزید سخت کی جا رہی ہے۔