اسلام آباد (نیوز ڈیسک)بھارتی ریاست اتر پردیش کے شہر گریٹر نوئیڈا میں ایک افسوسناک واقعہ پیش آیا، جہاں گھریلو تنازع کے بعد ایک شخص نے 16ویں منزل سے چھلانگ لگا کر اپنی زندگی کا خاتمہ کر لیا۔

بھارتی ذرائع ابلاغ کے مطابق یہ واقعہ گریٹر نوئیڈا کے علاقے بسرکھ میں واقع پیرا ماؤنٹ ایموشنز ہاؤسنگ سوسائٹی میں پیش آیا۔ 38 سالہ شتروگھن سنہا، جو پیشے کے لحاظ سے سافٹ ویئر انجینئر تھا، کا اپنی اہلیہ کے ساتھ شدید جھگڑا ہوا۔پولیس کے مطابق تلخ کلامی کے دوران شتروگھن سنہا نے مبینہ طور پر اپنی اہلیہ پر حملہ کرنے کی کوشش کی۔ اسی دوران اہلیہ کی بہن بیچ بچاؤ کے لیے آگے آئی تو سنہا نے سبزی کاٹنے والے چاقو سے اس پر وار کر دیا، جس کے نتیجے میں اس کے ہاتھ پر زخم آئے اور خون بہنے لگا۔جب شتروگھن سنہا کی بیوی نے اپنی بہن کو زخمی حالت میں دیکھا تو اس نے پولیس کو اطلاع دینے کی کوشش کی۔ پولیس کو کال کیے جانے کے خوف اور ممکنہ بدنامی کے باعث سنہا گھبرا گیا اور خود کو کمرے میں بند کر لیا۔اہلیہ اور سالی کی جانب سے دروازہ کھولنے اور پولیس کے آنے کی بات کہنے پر اس نے اچانک فلیٹ کی بالکونی سے نیچے چھلانگ لگا دی۔ زمین پر گرنے کے باعث وہ موقع پر ہی جان کی بازی ہار گیا۔پولیس کا کہنا ہے کہ زخمی سالی کو فوری طبی امداد دی گئی اور اب اس کی حالت خطرے سے باہر ہے۔ شتروگھن سنہا کی لاش کو پوسٹ مارٹم کے لیے اسپتال منتقل کر دیا گیا ہے۔

ابتدائی تفتیش میں یہ بات سامنے آئی ہے کہ شتروگھن سنہا گزشتہ چھ ماہ سے بے روزگار تھا اور شدید ذہنی دباؤ کا شکار تھا۔ پولیس کے مطابق واقعے سے قبل اس نے شراب بھی پی رکھی تھی، جبکہ پڑوسیوں کا کہنا ہے کہ میاں بیوی کے درمیان اکثر جھگڑے رہتے تھے۔پولیس نے مزید بتایا کہ متوفی ایک آئی ٹی کمپنی میں سافٹ ویئر انجینئر کے طور پر کام کر چکا تھا۔ اس کی شادی کو تقریباً 11 برس ہو چکے تھے اور اس کا ایک آٹھ سالہ بیٹا بھی ہے، جبکہ اس کی اہلیہ بھی ایک آئی ٹی کمپنی میں بطور سافٹ ویئر انجینئر خدمات انجام دے رہی ہیں۔