اسلام آباد (نیوز ڈیسک) امریکی صدر ڈونلڈ ٹرمپ کے سرکاری طیارے ایئر فورس ون میں سوئٹزرلینڈ روانگی کے فوراً بعد تکنیکی خرابی سامنے آ گئی، جس کے باعث طیارے کو احتیاطی طور پر واپس واشنگٹن لانے کا فیصلہ کیا گیا۔
وائٹ ہاؤس کے ترجمان کے مطابق جیسے ہی طیارے نے پرواز بھری، عملے نے ایک فنی مسئلے کی نشاندہی کی۔ ترجمان کا کہنا تھا کہ حفاظتی اقدامات کے تحت طیارے کا رخ واپس موڑ دیا گیا ہے، تاہم کسی ہنگامی صورتحال کی اطلاع نہیں ملی۔ صدر ٹرمپ اب متبادل طیارے کے ذریعے ڈیووس جائیں گے۔
بیان کے مطابق ایئر فورس ون کو بحفاظت جوائنٹ بیس اینڈریوز پر اتار لیا گیا، جہاں ابتدائی جانچ میں معمولی نوعیت کی الیکٹرک خرابی سامنے آئی۔ حکام کے مطابق یہ فیصلہ مکمل احتیاط کے پیش نظر کیا گیا تاکہ کسی بھی ممکنہ خطرے سے بچا جا سکے۔
واپسی کے بعد صدر ٹرمپ ایک دوسرے طیارے میں سوار ہو کر ورلڈ اکنامک فورم میں شرکت کے لیے ڈیووس روانہ ہوں گے۔ روانگی سے قبل صحافیوں سے مختصر گفتگو میں صدر ٹرمپ نے کہا کہ یہ سفر غیر معمولی ہوگا اور وہ نہیں جانتے کہ آگے کیا ہوگا، تاہم امریکہ کی نمائندگی بھرپور انداز میں کی جا رہی ہے۔
واضح رہے کہ اس سے قبل صدر ڈونلڈ ٹرمپ نے وائٹ ہاؤس میں ایک پریس بریفنگ کے دوران اپنی حکومت کی کارکردگی کا ذکر کرتے ہوئے اقوام متحدہ پر تنقید کی تھی اور ایک بار پھر اس مؤقف کا اظہار کیا تھا کہ امریکہ کو گرین لینڈ پر کنٹرول حاصل کرنا چاہیے۔
