ہریانہ (این این آئی)بھارتی ریاست ہریانہ کے ایک جوڑے کے ہاں 10 بیٹیوں کے بعد بیٹے کی پیدائش ہوئی۔بھارتی میڈیا کے مطابق 37 سالہ خاتون کی شادی 38 سالہ سنجے کمار سے 2007 میں ہوئی تھی، 19 سال کے دوران جوڑے کے ہاں 10 بیٹیوں کی پیدائش ہوئی۔بھارتی میڈیا سے گفتگو کرتے ہوئے سنجے کمار نے بتایا کہ ہمیں بیٹے کی خواہش تھی اور میری بیٹیاں بھی چاہتی تھیں کہ ان کا بھائی ہو، خدا نے اب بیٹا دیا ہے۔

سنجے کمار کے مطابق ان کی پہلی بیٹی 12 ویں کلاس کی طالبہ ہے جبکہ 10 میں سے زیادہ تر بیٹیاں اسکول جاتی ہیں۔ان کی کہانی سوشل میڈیا پر اس وقت وائرل ہوئی جب میڈیا سے گفتگو کے دوران سنجے بیٹیوں کے نام بھول گئے۔میڈیا نے ان کی بیٹیوں کا نام پوچھا تو سنجے کو نام بتانے میں مشکلات پیش آئیں تاہم انہوںنے کہاکہ وہ اپنی تمام بیٹیوں کو تعلیم دلوانے کے خواہشمند ہیں۔دوسری جانب خاتون کی ڈیلیوری کرنے والی ڈاکٹر نے بتایا کہ خاتون کی زچگی کا عمل انتہائی خطرناک تھا لیکن خوش قسمتی سے ماں اور بچہ اب صحت مند ہیں۔