اسلام آباد (نیوز ڈیسک) روس نے چاند پر توانائی کے ایک بڑے منصوبے پر کام شروع کرنے کی تیاری کر لی ہے، جس کے تحت وہاں پاور پلانٹ قائم کرنے کا ارادہ ظاہر کیا گیا ہے۔

غیر ملکی خبر رساں ادارے کے مطابق روس اپنے قمری خلائی منصوبوں اور روس۔چین کے مشترکہ تحقیقی اسٹیشن کو توانائی فراہم کرنے کے لیے آئندہ برسوں میں چاند پر پاور پلانٹ نصب کرنے کی منصوبہ بندی کر رہا ہے۔

روس کی سرکاری خلائی ایجنسی روسکوسموس نے اپنے بیان میں بتایا کہ ادارہ 2036 تک قمری پاور اسٹیشن کی تعمیر کا ہدف رکھتا ہے، جس کے لیے ایرو اسپیس کمپنی لاووچکن ایسوسی ایشن کے ساتھ معاہدہ کیا جا چکا ہے۔ اگرچہ بیان میں پاور پلانٹ کی نوعیت کی براہِ راست وضاحت نہیں کی گئی، تاہم یہ ضرور بتایا گیا کہ منصوبے میں روس کا بڑا جوہری تحقیقی ادارہ شامل ہوگا۔

روسکوسموس کے مطابق اس پاور پلانٹ کا مقصد چاند پر جاری روسی خلائی پروگرام کو توانائی فراہم کرنا ہے، جس میں قمری روورز، فلکیاتی رصدگاہ اور روس و چین کا مشترکہ بین الاقوامی قمری ریسرچ اسٹیشن شامل ہیں۔

ادارے کا کہنا ہے کہ یہ منصوبہ ایک مستقل سائنسی قمری بیس کے قیام اور محدود مدت کے مشنز سے طویل المدتی تحقیقی پروگرام کی جانب منتقلی میں کلیدی کردار ادا کرے گا۔

اس سے قبل روسکوسموس کے سربراہ دمتری بکانوف بھی یہ بیان دے چکے ہیں کہ ادارے کے اہم اہداف میں چاند پر نیوکلیئر پاور پلانٹ کا قیام اور سیارہ زہرہ کی تحقیق شامل ہے، جسے زمین کا ہم شکل سیارہ بھی کہا جاتا ہے۔