ریاض (این این آئی)سعودی عرب میں 71کلوگرام منشیات وصول کرتے ہوئے 6پاکستانی شہریوں کو گرفتار کرلیا گیا۔ سعودی وزارتِ داخلہ کے سکیورٹی ترجمان طلال الشلہوب کے مطابق جنرل ڈائریکٹوریٹ آف نارکوٹکس کنٹرول نے زکوة، ٹیکس اینڈ کسٹمز اتھارٹی کے تعاون سے ریاض ریجن میں مقیم 6پاکستانی باشندوں کو 71کلو گرام میتھایمفیٹامین وصول کرتے ہوئے گرفتار کرلیا ۔طلال الشلہوب نے بتایا کہ جی ڈی این سی کی جانب سے عمانی حکام کے ساتھ شیئر کی گئی انٹیلی جنس معلومات کی بنیاد پر سمگلنگ کی دو کوششیں ناکام بنا دی گئیں جن کے دوران 200کلوگرام سے زائد منشیات ضبط کی گئیں۔سکیورٹی ترجمان نے کہا کہ سعودی عرب منشیات کے ذریعے ملکی سلامتی اور نوجوانوں کو نشانہ بنانے والی مجرمانہ سرگرمیوں پر کڑی نظر رکھے گا، ایسی کوششوں کو ناکام بنائے گا اور ملوث عناصر کو قانون کے کٹہرے میں لایا جائے گا۔