اسلام آباد (نیوز ڈیسک) دنیا کے مختلف حصوں میں کافی کے شوقین افراد نت نئے ذائقوں کی تلاش میں رہتے ہیں، اسی لیے کئی ممالک میں کافی کو منفرد انداز میں پیش کرنے کا رجحان بڑھ رہا ہے۔اسی سلسلے میں چین کے دارالحکومت بیجنگ میں واقع ایک میوزیم کی جانب سے پیش کی گئی انوکھی کافی نے سب کی توجہ اپنی جانب کھینچ لی ہے۔غیر ملکی میڈیا کے مطابق اس کافی کا سب سے حیران کن پہلو اس کی تیاری ہے، جس میں خشک کیے گئے پیلے میل ورمز شامل کیے جاتے ہیں، جب کہ کپ کے اوپر باریک پسا ہوا لال بیگوں کا پاؤڈر چھڑک کر اسے پیش کیا جاتا ہے۔جو لوگ اس کافی کو آزما چکے ہیں، وہ اس کے ذائقے کو ’’جلا ہوا‘‘ اور کچھ ’’کھٹا‘‘ قرار دیتے ہیں۔
ساؤتھ چائنا مارننگ پوسٹ کے مطابق اس منفرد روچ کافی کی قیمت 45 یوآن (تقریباً 6 ڈالر) ہے اور اسے ایک کیڑوں سے متعلق تھیم پر مبنی میوزیم کی کافی شاپ میں فروخت کیا جاتا ہے۔میوزیم کے ایک ملازم نے بتایا کہ یہ کافی سب سے پہلے جون کے آخر میں متعارف کروائی گئی تھی، لیکن حال ہی میں سوشل میڈیا پر وائرل ہونے کے بعد لوگوں میں زیادہ مشہور ہوئی۔ ان کے مطابق کیڑوں پر مبنی میوزیم میں اس طرح کی کافی پیش کرنا ایک دلکش خیال ثابت ہوا ہے۔چینی روایتی طب کے ماہرین کا کہنا ہے کہ کاکروچ پاؤڈر خون کی روانی بہتر بنانے میں مدد دے سکتا ہے، جبکہ پروٹین سے بھرپور خوردنی کیڑے قوتِ مدافعت میں اضافہ کرتے ہیں۔میوزیم کی جانب سے اس روچ کافی کے علاوہ بھی کئی عجیب و غریب مشروبات پیش کیے جا چکے ہیں جن میں پکچر پلانٹ سے تیار کردہ ’’ڈائجیسٹو جوس‘‘ اور چیونٹیوں سے تیار ’’اینٹ ڈرنک‘‘ بھی شامل ہیں۔
