انقرہ(این این آئی)ترکیہ کے جنوب مغربی ساحل کے قریب ایجین سمندر میں تارکین وطن کی ایک کشتی ڈوبنے کی وجہ سے 14افرادہلاک ہوگئے۔عالمی خبر رساں ادارے کے مطابق کشتی میں 18افراد سوار تھے،دو کو زندہ بچا لیا گیا جن میں سے ایک افغان شہری ہے۔گورنر آفس سے جاری بیان میں بتایا گیا کہ یہ کشتی بودرم کے ساحل سے روانہ ہوئی تھی جو ترکیہ کے سیاحتی صوبے موغلا کا مشہور مقام ہے تاہم کشتی میں روانگی کے کچھ ہی دیر بعد پانی بھرنا شروع ہوگیا تھا جس کے باعث ممکنہ طور یہ حادثہ پیش آیا۔

ایک زندہ بچنے والے شخص نے بتایا کہ وہ چھ گھنٹے تک تیر کر ساحل تک پہنچا ،جبکہ دوسرا زندہ بچ جانے والا شخص قریب کے ایک جزیرے سے ملا۔حکام نے کہاکہ ریسکیو آپریشن جاری ہے اور 2لاپتا افراد کی تلاش کیلئے چار کوسٹ گارڈ کشتیاں، ایک غوطہ خور ٹیم اور ایک ہیلی کاپٹر نے حصہ لے رہے ہیں۔حکام نے کہا کہ تاحال یہ واضح نہیں ہو سکا کہ کشتی میں سوار افراد یونان کے جزیرے کوس جانے کی کوشش کر رہے تھے یا نہیں۔ادھر ترکیہ کی وزارتِ داخلہ نے کہاکہ گزشتہ ہفتے ایک ملک گیر کارروائی کے دوران 169افراد کو گرفتار کیا گیا جو مبینہ طور پر انسانی اسمگلنگ میں ملوث تھے جن میں سے زیادہ تر غیر ملکی شہری ہیں۔