اسلام آباد (نیوز ڈیسک) بھارت کی ریاست مدھیہ پردیش میں پولیس کی مبینہ بے حسی کے خلاف احتجاج کرتے ہوئے تقریباً 24 خواجہ سراؤں نے زہر پی کر اجتماعی خودکشی کی کوشش کی۔بھارتی میڈیا کے مطابق یہ افسوسناک واقعہ اندور شہر میں پیش آیا، جہاں خواجہ سراؤں کی جانب سے ایک ساتھی کے ساتھ ہونے والی زیادتی کے ملزمان کی گرفتاری نہ ہونے پر شدید احتجاج کیا جا رہا تھا۔ اسی دوران مشتعل مظاہرین نے اجتماعی طور پر زہریلا فنائل پی لیا، جس کی ویڈیو سوشل میڈیا پر تیزی سے وائرل ہو گئی۔عینی شاہدین کے مطابق واقعے کے بعد موقع پر موجود لوگوں نے فوری طور پر تمام متاثرہ خواجہ سراؤں کو اسپتال منتقل کیا۔

اسپتال انتظامیہ کے مطابق تمام افراد کو طبی امداد فراہم کی گئی اور اب ان کی حالت خطرے سے باہر ہے۔میڈیا رپورٹس کے مطابق احتجاج اس وقت شروع ہوا جب دو افراد پر ایک خواجہ سرا کو جنسی زیادتی کا نشانہ بنانے کا الزام لگا، تاہم پولیس کی جانب سے مبینہ طور پر بروقت کارروائی نہ ہونے پر خواجہ سراؤں نے انتہائی قدم اٹھایا۔پولیس حکام کا کہنا ہے کہ واقعے میں ملوث ملزمان کی تلاش جاری ہے اور ان کی گرفتاری کے بعد مزید قانونی کارروائی کی جائے گی۔دوسری جانب اس واقعے کے بعد بھارت کے مختلف شہروں میں خواجہ سرا کمیونٹی سراپا احتجاج ہے اور متاثرہ افراد کو انصاف دلانے کے لیے مظاہرے کیے جا رہے ہیں۔