اسلا م آباد ( نیوز ڈیسک) اسرائیل نے غزہ جنگ بندی معاہدے کے تحت قیدیوں کی رہائی کی فہرست سے فلسطین کے معروف سیاسی رہنما مروان البرغوثی کا نام خارج کر دیا ہے۔فلسطینی جماعت فتح موومنٹ سے تعلق رکھنے والے مروان البرغوثی سن 2003 سے اسرائیلی قید میں ہیں۔ دو دہائیوں سے زائد عرصہ جیل میں گزارنے کے باوجود وہ آج بھی مغربی کنارے اور غزہ کے عوام میں انتہائی مقبول رہنما تصور کیے جاتے ہیں۔

ذرائع کے مطابق، غزہ فائر بندی ڈیل کے دوران حماس کی جانب سے جو قیدیوں کی فہرست اسرائیلی حکام کو دی گئی تھی، اس میں مروان البرغوثی کا نام بھی شامل ہونے کا امکان ظاہر کیا جا رہا تھا۔ تجزیہ کاروں کا ماننا ہے کہ اگر انہیں رہا کیا جاتا تو وہ مستقبل میں فلسطینی اتھارٹی میں اہم سیاسی کردار ادا کر سکتے تھے۔تاہم، عرب میڈیا کی رپورٹوں کے مطابق، اسرائیلی حکام نے واضح کیا ہے کہ برغوثی کا نام رہائی پانے والے قیدیوں کی فہرست سے نکال دیا گیا ہے اور انہیں اس ڈیل کے تحت رہا نہیں کیا جائے گا۔اسرائیلی حکام کے مطابق، مروان البرغوثی کی رہائی پر کوئی غور نہیں کیا جا رہا اور وہ اسیران کی موجودہ فہرست کا حصہ نہیں ہیں۔