اسلام آباد (نیوز ڈیسک) واشنگٹن: امریکی صدر ڈونلڈ ٹرمپ نے مشرق وسطیٰ اور غزہ کے لیے 21 نکاتی امن فارمولا مسلم ممالک کے رہنماؤں کے سامنے پیش کر دیا۔امریکی خصوصی ایلچی برائے مشرق وسطیٰ اسٹیو وٹکوف نے بتایا کہ صدر ٹرمپ کا امن منصوبہ اقوام متحدہ کی جنرل اسمبلی کے اجلاس کے موقع پر چند رہنماؤں کو دیا گیا ہے۔ ان کے مطابق امید ہے کہ آنے والے دنوں میں غزہ کے حوالے سے کوئی مثبت پیش رفت سامنے آئے گی۔

انہوں نے مزید کہا کہ ایران کے ساتھ بھی بات چیت جاری ہے، تاہم تہران نے سخت رویہ اختیار کیا ہوا ہے، اس کے باوجود واشنگٹن ایران سے مذاکرات کا خواہاں ہے۔خیال رہے کہ ایک روز قبل نیویارک میں امریکی صدر کی اسلامی ممالک کے سربراہان سے ملاقات ہوئی تھی جو تقریباً پچاس منٹ تک جاری رہی۔

اس ملاقات میں غزہ سمیت مشرق وسطیٰ کی مجموعی صورتحال پر تفصیل سے گفتگو کی گئی۔اس ملاقات میں وزیراعظم شہباز شریف کے ساتھ ساتھ ترکیہ، سعودی عرب، متحدہ عرب امارات، مصر، اردن، قطر اور انڈونیشیا کے رہنماؤں نے بھی شرکت کی۔بعد ازاں میڈیا سے بات کرتے ہوئے صدر ٹرمپ نے مسلم قیادت سے ہونے والی اس ملاقات کو “انتہائی کامیاب” قرار دیا اور کہا کہ غزہ کے حوالے سے ہونے والی گفتگو بہت مثبت رہی۔