اسلام آباد(نیو ز ڈیسک) افغانستان سے تعلق رکھنے والا 13 سالہ لڑکا ایک حیران کن انداز میں بھارت کے دارالحکومت دہلی پہنچ گیا۔ ابتدائی معلومات کے مطابق وہ شمالی افغانستان کے شہر قندوز کا رہائشی ہے۔ ایئرپورٹ عملے نے بچے کو پکڑ کر سینٹرل انڈسٹریل سیکیورٹی فورس (سی آئی ایس ایف) کے حوالے کیا، جہاں سے اُسے مزید پوچھ گچھ کے لیے ٹرمینل تھری منتقل کیا گیا۔ٹائمز آف انڈیا کے مطابق یہ واقعہ اتوار کی صبح پیش آیا جب کم عمر لڑکا ایک مسافر طیارے کے لینڈنگ گیئر میں چھپ کر دہلی آ پہنچا، جس پر بھارتی حکام سخت پریشان ہوگئے۔

رپورٹ میں بتایا گیا کہ وہ کابل ایئرپورٹ کے ممنوعہ حصے میں داخل ہونے میں کامیاب ہوا اور افغان ایئرلائن KAM کی پرواز RQ-4401 کے عقبی لینڈنگ گیئر کمپارٹمنٹ میں جا چھپا۔ یہ پرواز تقریباً دو گھنٹے کے سفر کے بعد صبح 11 بجے دہلی اتری۔ڈان نیوز کے مطابق لینڈنگ کے فوراً بعد جہاز کے عملے نے بچے کو ایئرکرافٹ کے قریب آوارہ پھرتے دیکھا اور فوراً ایئرپورٹ سیکیورٹی کو اطلاع دی۔ پوچھ گچھ میں لڑکے نے بتایا کہ اس نے یہ قدم محض تجسس کے باعث اٹھایا تھا اور اسے اس بات کا علم نہیں تھا کہ ایسا کرنا جان لیوا بھی ثابت ہوسکتا ہے۔ واضح رہے کہ لینڈنگ گیئر کا یہ حصہ عام طور پر آکسیجن کی کمی اور شدید سردی کے باعث خطرناک سمجھا جاتا ہے، خاص طور پر بلندی پر۔بعد میں حکام نے قانونی کارروائی مکمل کرنے کے بعد اُسی ایئرلائن کی پرواز کے ذریعے بچے کو واپس افغانستان روانہ کردیا، جو اتوار کی دوپہر 12 بج کر 30 منٹ پر دہلی سے اڑی۔