اسلام آباد(نیو ز ڈیسک) برطانیہ، کینیڈا، آسٹریلیا اور پرتگال کے بعد اب فرانس نے بھی فلسطین کو باضابطہ طور پر ریاست تسلیم کرلیا ہے۔اقوام متحدہ کی کانفرنس سے خطاب کرتے ہوئے فرانسیسی صدر ایمانویل میکرون نے اعلان کیا کہ فرانس فلسطین کو ریاست تسلیم کرتا ہے۔ انہوں نے غزہ میں جاری جنگ کو غیرمنصفانہ اور ناقابل قبول قرار دیا۔صدر میکرون کا کہنا تھا کہ “مزید انتظار ممکن نہیں، وقت آ گیا ہے کہ یہ جنگ ختم ہو اور حماس کی قید میں موجود باقی 48 مغویوں کو فوری طور پر رہا کیا جائے۔” اپنی تقریر کے دوران انہوں نے ان ممالک کا بھی حوالہ دیا جنہوں نے فلسطینی ریاست کو تسلیم کیا، جن میں اندورا، آسٹریلیا، بیلجیم، لکسمبرگ، مالٹا، مراکش، برطانیہ، کینیڈا اور سان مارینو شامل ہیں۔
فرانسیسی صدر نے کہا کہ ان ممالک نے جولائی میں ہماری اپیل پر مثبت ردعمل دیا اور امن کے لیے درست اور ذمہ دارانہ فیصلہ کیا۔ ان کا کہنا تھا کہ فلسطینیوں کو ان کے حقوق دینے سے اسرائیلی عوام کے حقوق متاثر نہیں ہوں گے۔انہوں نے عالمی برادری کو خبردار کیا کہ دنیا امن کے ایک نادر موقع کے قریب ہے، لیکن اگر اس موقع کو ضائع کیا گیا تو یہ ہمیشہ کے لیے ہاتھ سے نکل جائے گا۔صدر میکرون نے دو ریاستی حل کی بھرپور وکالت کرتے ہوئے کہا کہ پائیدار امن صرف اسی صورت میں ممکن ہے جب اسرائیل اور فلسطین بطور دو آزاد ریاستیں ایک ساتھ رہیں۔خیال رہے کہ حالیہ دنوں میں برطانیہ، کینیڈا، آسٹریلیا اور پرتگال بھی فلسطین کو آزاد ریاست کے طور پر تسلیم کرنے کا اعلان کرچکے ہیں۔
