اسلام آباد (نیوز ڈیسک) تقریباً تین دہائیوں بعد لاپتہ ہونے والے شخص نصیرالدین کی میت بالآخر گلیشیئر سے ملنے کے بعد سپردِ خاک کر دی گئی۔تفصیلات کے مطابق کوہستان کے علاقے پالس میں حالیہ دنوں گلیشیئر کے پگھلنے کے نتیجے میں ایک لاش برآمد ہوئی، جو حیرت انگیز طور پر صحیح حالت میں تھی۔ لاش کے لباس، واسکٹ اور دیگر اشیاء بھی محفوظ تھیں، جب کہ جیب میں موجود قومی شناختی کارڈ سے شناخت ممکن ہوئی۔

نجی ٹی وی چینل کی رپورٹ کے مطابق متوفی کے بھائی کثیرالدین نے تصدیق کرتے ہوئے بتایا کہ جون 1997ء میں خاندان کو دشمنی کے باعث اپنا علاقہ چھوڑ کر الائی کی طرف ہجرت کرنا پڑی تھی، اسی دوران نصیرالدین گلیشیئر کی لپیٹ میں آ کر لاپتہ ہو گیا تھا۔کثیرالدین کا کہنا تھا کہ اتنے طویل عرصے بعد بھائی کی میت کا ملنا ہمارے لیے حیران کن اور جذباتی لمحہ ہے۔ ہم نے امید چھوڑ دی تھی کہ وہ کبھی ملے گا، مگر 28 برس بعد اس کی باقیات کی واپسی ناقابل یقین واقعہ ہے۔نصیرالدین کی نمازِ جنازہ آبائی علاقے میں ادا کی گئی، جس میں مقامی افراد کی بڑی تعداد نے شرکت کی اور مرحوم کے اہلِ خانہ سے اظہارِ تعزیت کیا۔