اسلام آباد (نیوز ڈیسک)  فرانسیسی جریدے کی ایک رپورٹ نے انکشاف کیا ہے کہ میکسیکو کے جرائم پیشہ گروہ روس یوکرین تنازع سے فائدہ اٹھاتے ہوئے میدانِ جنگ میں اپنی موجودگی بڑھا رہے ہیں۔ رپورٹ کے مطابق مافیا سے وابستہ افراد جعلی شناختوں کے ذریعے یوکرین میں داخل ہوئے اور وہاں جدید جنگی ڈرونز چلانے کی تربیت حاصل کر رہے ہیں۔

ذرائع کے مطابق، یہ افراد یوکرین میں ایف پی وی (First Person View) ڈرون آپریٹرز کی تربیت لے رہے ہیں، جو جنگی صورتحال میں انتہائی اہم اور مہلک کردار ادا کرتے ہیں۔

میکسیکو کی انٹیلی جنس ایجنسی نے یوکرین کو ان مشتبہ افراد کے بارے میں خبردار کر دیا ہے، جس کے بعد یوکرین کی فوجی انٹیلی جنس نے ہسپانوی زبان بولنے والے غیر ملکی رضا کاروں کی جانچ شروع کر دی ہے۔

فرانسیسی جریدے کے مطابق، کچھ جنگجوؤں کو پرائیویٹ ملٹری کمپنیوں کے ذریعے بھیجا گیا تھا، جنہیں گرفتار کیا جا چکا ہے۔

یاد رہے کہ میکسیکو کے مافیاز پہلے ہی اپنے ملک میں ڈرون حملوں کے ذریعے مخالفین کو نشانہ بنا رہے ہیں، اور اب یوکرین سے حاصل کردہ جنگی مہارتوں سے ان کے مزید خطرناک ہونے کا خدشہ بڑھ گیا ہے۔

روس کی جانب سے حملوں میں شدت، کیف میں تباہی

دوسری جانب، روس نے یوکرین پر حملوں میں اضافہ کر دیا ہے۔ عالمی میڈیا رپورٹس کے مطابق، حالیہ روسی میزائل اور ڈرون حملوں میں یوکرین کے 6 شہری جاں بحق جبکہ 52 زخمی ہوئے، جن میں کئی کی حالت نازک ہے۔

یہ حملے کیف کے مختلف علاقوں پر رات گئے کیے گئے، جن کے نتیجے میں شہر کے 4 اضلاع میں مجموعی طور پر 27 مقامات کو نقصان پہنچا۔ یوکرینی صدر نے بتایا کہ روس نے ایک ہی رات میں 300 سے زائد ڈرون اور 8 میزائل داغے۔

روسی وزارت دفاع نے دعویٰ کیا ہے کہ ان حملوں کا ہدف کیف میں موجود اسلحہ ڈپو اور دیگر فوجی تنصیبات تھیں۔ ادھر، یوکرین کی جوابی کارروائی میں روسی شہر پینزا میں واقع ایک الیکٹرانکس پلانٹ تباہ ہو گیا۔ روس کا کہنا ہے کہ یوکرین کی طرف سے فائر کیے گئے 32 ڈرونز کو فضا میں ہی تباہ کر دیا گیا۔