اسلام آباد (نیوز ڈیسک)امریکی ریاست الینوائے میں ایک بھارتی نژاد خاتون کو معروف ریٹیل اسٹور “ٹارگٹ” سے قیمتی اشیاء چوری کرنے کے الزام میں گرفتار کر لیا گیا ہے۔ سوشل میڈیا پر گردش کرنے والی ویڈیو میں خاتون کو پولیس کے ہاتھوں گرفتار ہوتے ہوئے دیکھا جا سکتا ہے۔اطلاعات کے مطابق، یہ واقعہ یکم مئی کو پیش آیا اور اس کی نگرانی کیمرے کی ویڈیو حال ہی میں منظر عام پر آئی ہے۔ پولیس ذرائع کے مطابق، خاتون اننتا اوولانی پر الزام ہے کہ انہوں نے تقریباً 1300 امریکی ڈالر، یعنی تین لاکھ پاکستانی روپے سے زائد مالیت کا سامان چوری کرنے کی کوشش کی۔

رپورٹس میں بتایا گیا ہے کہ خاتون اسٹور میں سات گھنٹے تک خریداری کرتی رہیں، جس کے بعد اسٹور کے عملے کو شک ہوا اور انہوں نے پولیس کو مطلع کر دیا۔ اطلاع ملنے پر پولیس کی ایک ٹیم، جس میں ایک خاتون افسر اور دو مرد اہلکار شامل تھے، فوراً موقع پر پہنچی۔پولیس نے اننتا سے چار گھنٹے سے زائد وقت تک سوالات کیے۔ ویڈیو میں دیکھا جا سکتا ہے کہ ملزمہ نے اپنی صفائی میں کہا کہ وہ سامان کی قیمت ادا کرنے کو تیار ہیں۔ تاہم خاتون افسر نے انہیں جواب دیا کہ آپ کو پہلے ادائیگی کرنی چاہیے تھی، اب بعد میں کرنے کی پیشکش ناقابل قبول ہے، اس لیے ہمیں آپ کا شناختی کارڈ درکار ہے۔پولیس نے ملزمہ کی جانب سے فوری ادائیگی کی پیشکش کو مسترد کرتے ہوئے انہیں گرفتار کر کے تھانے منتقل کر دیا۔