تل ابیب (نیوز ڈیسک)اسرائیل کے آرمی چیف ایال زمیر نے حالیہ جنگ کے دوران ایران کے اندر خفیہ فوجی کارروائیوں کا اعتراف کر لیا ہے۔غیر ملکی خبر رساں ادارے “جیو نیوز” کے مطابق اسرائیلی فوج کے سربراہ جنرل ایال زمیر نے قوم سے براہِ راست خطاب کے دوران دعویٰ کیا کہ اسرائیلی کمانڈوز نے ایران کے اندر خفیہ مشن سرانجام دیے، جو کہ 12 روزہ جنگ کے دوران انجام پائے۔
ان کا کہنا تھا کہ اسرائیل نے ایرانی فضائی حدود پر مکمل کنٹرول حاصل کیا، اور جہاں بھی کارروائی کی گئی، وہ مکمل منصوبہ بندی اور ہم آہنگی کے ساتھ کی گئی۔ انہوں نے کہا کہ ہماری فضائیہ اور زمینی دستوں کے درمیان مضبوط کوآرڈینیشن، فریب پر مبنی جنگی حکمت عملی اور بروقت فیصلہ سازی کی بدولت یہ سب ممکن ہوا۔آرمی چیف نے مزید بتایا کہ اسرائیلی فورسز دشمن کے گہرے علاقوں میں بھی خفیہ طور پر فعال رہیں، جس نے ہماری افواج کو آزادانہ کارروائیوں کی سہولت دی۔
یہ پہلا موقع ہے کہ کسی اعلیٰ اسرائیلی فوجی عہدیدار نے کھل کر اس بات کا اعتراف کیا ہے کہ اسرائیلی زمینی افواج ایران میں خفیہ کارروائیوں میں شامل رہی ہیں۔اس سے قبل اسرائیلی میڈیا نے رپورٹ کیا تھا کہ موساد کے اہلکاروں نے ایرانی حدود میں کارروائیاں کی تھیں۔ ان رپورٹس کے ساتھ کچھ ویڈیوز بھی جاری کی گئیں جن میں دعویٰ کیا گیا کہ یہ کارروائیاں ایران پر حملے کے آغاز سے کچھ دیر پہلے کی ہیں۔
