اسلام آباد (نیوز  ڈیسک) ایرانی پاسدارانِ انقلاب نے تصدیق کی ہے کہ اسرائیل پر کیے گئے حالیہ حملے میں جدید ترین “قدر-ایچ” بیلسٹک میزائل کا استعمال کیا گیا، جو متعدد وارہیڈ لے جانے کی صلاحیت رکھتا ہے۔ یہ میزائل پہلی مرتبہ کسی عملی کارروائی میں استعمال کیا گیا ہے۔ایرانی خبر رساں ادارے تسنیم کی رپورٹ کے مطابق، “آپریشن وعدہ صادق 3” کے تحت اسرائیل پر 21ویں حملے میں ایران نے سالڈ اور مائع ایندھن سے چلنے والے بیلسٹک میزائلوں کے ساتھ ساتھ ڈرونز بھی فائر کیے۔

پاسدارانِ انقلاب کے جاری کردہ بیان میں کہا گیا ہے کہ قدر-ایچ میزائل کا مقصد اسرائیلی اہداف پر مہلک اور دقیق حملہ کرنا تھا، جس میں میزائل کی نشانے پر پہنچنے کی صلاحیت کو مزید مؤثر بنانے کے لیے مختلف تکنیکی تدابیر اپنائی گئیں۔مزید کہا گیا کہ یہ میزائل حملے اسرائیل کے زیر قبضہ فلسطینی علاقوں کے شمال سے جنوب تک مختلف مقامات کو نشانہ بنانے کے لیے ترتیب دیے گئے تھے۔پاسداران کا کہنا ہے کہ اسرائیل کے خلاف کارروائیاں جاری رہیں گی، اور مقبوضہ علاقوں میں بسنے والوں کو مسلسل خطرے کے الارم سننا پڑیں گے کیونکہ ایران اپنے ردعمل میں نرمی نہیں کرے گا۔