ریاض (نیوز ڈیسک): سعودی عرب نے سال 2025 کے لیے بین الاقوامی طلبہ کے لیے مکمل فنڈڈ اسکالرشپس کا اعلان کر دیا ہے، جس سے دنیا بھر کے طلبہ، بشمول پاکستانی طلبا، فائدہ اٹھا سکتے ہیں۔ یہ اسکالرشپ پروگرام سعودی حکومت کے ’’Study in Saudi Arabia‘‘ پلیٹ فارم کے تحت پیش کیا گیا ہے، جس کے ذریعے بیچلر، ماسٹرز اور پی ایچ ڈی کی سطح کے مختلف تعلیمی پروگرامز میں داخلے کی سہولت دی گئی ہے۔
اس منصوبے کے تحت امیدواروں کو کسی مخصوص یونیورسٹی میں براہِ راست درخواست دینے کی ضرورت نہیں ہوگی۔ اس کے بجائے، وہ سرکاری آن لائن پلیٹ فارم پر جا کر اپنی پسندیدہ سرکاری یونیورسٹی کا انتخاب کر کے آن لائن درخواست دے سکتے ہیں۔ دلچسپ بات یہ ہے کہ یہ پورا عمل مکمل طور پر مفت ہے اور اس کے لیے کوئی درخواست فیس نہیں لی جاتی۔
اہلیت کے معیار کے مطابق، یہ اسکالرشپ تمام ممالک کے امیدواروں کے لیے دستیاب ہے۔ درخواست دہندہ کی کم از کم عمر 16 سال ہونی چاہیے اور اس کے پاس کم از کم چھ ماہ تک کارآمد پاسپورٹ ہونا ضروری ہے۔ مزید برآں، مالی حیثیت کا ثبوت یا مالی ضمانت بھی درکار ہوگی۔ اگر امیدوار کی عمر 18 سال سے کم ہے تو اسے اپنے والدین یا سرپرست کی تحریری اجازت فراہم کرنا ہوگی۔
درخواست دہندگان کو ایک تازہ طبی رپورٹ جمع کروانی ہوگی جس میں یہ واضح ہو کہ وہ کسی متعدی بیماری میں مبتلا نہیں ہیں۔ اس کے ساتھ ساتھ، موزوں اور قابل قبول میڈیکل انشورنس بھی لازمی قرار دیا گیا ہے۔
وہ طلبہ جو ان تمام شرائط پر پورا اُترتے ہیں، وہ سعودی حکومت کے سرکاری پلیٹ فارم پر جا کر اسکالرشپ کے لیے آن لائن اپلائی کر سکتے ہیں اور اپنی مرضی کی سرکاری یونیورسٹی منتخب کر سکتے ہیں۔
