اسلام آباد (نیوز ڈیسک) بھارتی میڈیا نے اعتراف کیا ہے کہ پاکستان کی جوابی کارروائی میں بھارتی فضائیہ کے تین طیارے تباہ ہوئے، جبکہ مقبوضہ کشمیر میں گولہ باری سے 7 اہلکار ہلاک اور 35 زخمی ہوئے۔
خبر رساں اداروں کے مطابق، بھارتی سیکیورٹی ذرائع نے اس بات کی تصدیق کی ہے کہ پاک فضائیہ نے تین بھارتی جنگی طیارے مار گرائے ہیں۔ پاکستانی حملوں سے مقبوضہ کشمیر میں واقع بھارتی چیک پوسٹوں کو بھی بھاری نقصان پہنچا، جس کے نتیجے میں 7 ہلاکتیں اور درجنوں زخمیوں کی اطلاع ہے۔
ذرائع کا کہنا ہے کہ پاکستانی فوج نے اپنی دفاعی حکمت عملی کے تحت دشمن کو بھرپور جواب دیا۔ اس دوران “6 مہار بٹالین” کے ہیڈ کوارٹر کو بھی نشانہ بنایا گیا، جو وادی لیپا کے مقابل مقبوضہ علاقے میں واقع ہے۔ اسی طرح بھارت کا ایک اور بڑا نقصان اس وقت ہوا جب پاکستان نے “12 انفنٹری بریگیڈ” کے ہیڈ کوارٹر پر کامیاب حملہ کیا، یہ یونٹ بھارتی فوج کی 9 ڈویژن اور 15 کور کے تحت کام کر رہا تھا۔
اطلاعات کے مطابق، بھارت نے چھ مختلف مقامات پر میزائل حملے کیے، جس کے ردعمل میں پاکستان نے فوراً بھرپور کارروائی کی۔ اس میں پانچ بھارتی طیارے مار گرائے گئے جن میں تین رافیل، ایک مگ 29 اور ایک SU-30 شامل ہیں۔ بتایا گیا ہے کہ یہ طیارے پاکستانی حدود میں داخل ہونے کی کوشش کے دوران تباہ کیے گئے۔
پاکستانی فضائی اور زمینی افواج نے دشمن کی پوزیشنز پر بھرپور حملے کیے۔ ایک طیارہ بھاٹنڈا، دوسرا اکھنور اور تیسرا اونتی پورہ کے قریب گر کر تباہ ہوا۔ اس کے علاوہ، برنالہ سیکٹر میں بھارت کا ایک جاسوس ڈرون بھی مار گرایا گیا۔
لائن آف کنٹرول پر بھی پاکستان کی جوابی کارروائیاں جاری رہیں، جہاں بھارتی چیک پوسٹوں کو نشانہ بنایا گیا۔ پانڈو سیکٹر میں واقع بھارتی چوکی “جنگل 1” کو مکمل طور پر تباہ کر دیا گیا۔ وہاں سے دھوئیں کے بادل بلند ہوتے دیکھے گئے، جو کارروائی کی شدت کا ثبوت ہیں۔
تازہ ترین اطلاعات کے مطابق، پاکستان کی موثر کارروائیوں کے بعد بھارتی فوج نے لائن آف کنٹرول کے چورا کمپلیکس میں سفید جھنڈا لہرا کر پسپائی اختیار کر لی ہے، جو میدان جنگ میں بھارتی شکست کا واضح اشارہ ہے۔
