اسلام آباد (نیوز ڈیسک) یورپ سے تعلق رکھنے والے چار مسلمان حجاج، جن میں تین اسپین کے شہری اور ایک مراکش سے تعلق رکھنے والا حاجی شامل ہیں، حال ہی میں گھوڑوں پر سوار ہو کر سعودی عرب پہنچے۔ ان کا یہ غیر معمولی اور روحانی سفر سعودی عرب کے شمالی علاقے القریات میں واقع الحدیثہ سرحدی گزرگاہ پر اختتام پذیر ہوا، جہاں ان کا پرتپاک خیرمقدم کیا گیا۔
رپورٹس کے مطابق، جب یہ قافلہ الحدیثہ کراسنگ پر پہنچا تو سعودی حکام، والنٹیئرز اور مقامی افراد نے ان کا پھولوں، تحائف اور روایتی نعروں سے استقبال کیا۔ اس موقع پر الحدیثہ مرکز کے ڈائریکٹر، ممدوح المطیری نے کہا کہ ان حجاج کا یہ سفر خلوص نیت اور مضبوط ارادے کی قابلِ ستائش مثال ہے۔ ان کے بقول، یہ عمل اس بات کی علامت ہے کہ بیت اللہ کی زیارت کے لیے لوگ کس قدر ایمان افروز جذبے سے نکلتے ہیں۔
سعودی بارڈر کنٹرول ٹیم، میڈیکل عملہ اور معاون اسٹاف نے نہ صرف ان زائرین کا طبی معائنہ کیا بلکہ انہیں تازہ دم کرنے کے لیے ریفریشمنٹ اور دیگر سہولیات بھی فراہم کیں۔ ملک بھر میں حج سیزن کی تیاریوں کا سلسلہ زور و شور سے جاری ہے اور سعودی حکومت کی جانب سے زائرین کو ہرممکن سہولت دینے کے لیے ایک جامع حکمت عملی پر عمل درآمد ہو رہا ہے۔
الحدیثہ میں مقامی ترقیاتی تنظیم نے ان مسافروں کے اعزاز میں ایک خصوصی تقریب کا بھی اہتمام کیا، جہاں روایتی انداز میں مہمان نوازی کی گئی۔ اس موقع پر حاجیوں کو خوش آمدیدی تحائف، پھولوں کے گلدستے اور کٹس بھی پیش کی گئیں۔
