لاہور( این این آئی)عالمی سطح پرپروازوں کی مانیٹرنگ کرنے والی ایک ویب سائٹ کے مطابق ہفتہ وار 300بھارتی پروازیں پاکستان کی فضائی حدود استعمال کرتی ہیں جبکہ پی آئی اے کی پروازوں کی کوئی خاص تعداد بھارتی فضائی حدود استعمال نہیں کرتی ۔بھارت کی یورپ اور شمالی امریکہ کے لئے 134پروازیں پاکستان کی ائیر سپیس استعمال کرتی ہیں۔

سعودی عرب ،بحرین، متحدہ عرب امارات، کویت، اومان اور قطر کے لئے 144سے زائد پروازیں ہیں جوپاکستانی ائیرسپیس استعمال کرتی ہیں۔ اب انڈین پروازوں کوبحیرہ عرب یا وسطی ایشیا ء کے راستے اپنی منزل تک جانا ہو گا۔ میڈیا رپورٹ کے مطابق پاکستان کی جانب سے فضائی حدود بند کرنے کی وجہ سے ائیر انڈیا اور کئی دیگر کمپنیوں کا ایک ہی دن میں 10کروڑ بھارتی روپے سے زیادہ کا نقصان اٹھانا پڑا ہے ۔رپورٹ کے مطابق صرف ایک ہفتے میں دہلی ایئرپورٹ پر 300پروازیں متاثر ہوں گی جس میں اخراجات میں اضافے کے علاوہ پروازوں کی آمد اور روانگی کے اوقات میں تبدیلی شامل ہے،باقی ائیرپورٹس سے متاثر ہونے والی فلائٹس الگ ہیں۔

بھارتی وزیر اعظم نریندر مودی کے خصوصی طیارے کے علاوہ بھارت کی کئی ائیر لائنز بھی اپنی کمرشل فلائٹس کے لئے پاکستان کی فضائی حدود پاکستان کی اجازت سے استعمال کرتی تھیں لیکن بھارتی اقدامات کے جواب میں پاکستان نے رد عمل کے طور پر بھارت سے تعلق رکھنے والے تمام کمرشل فلائٹس سمیت ہر طرح کے جہازوں کی پاکستانی فضائی حدود میں آمد پر پابندی لگا ئی۔پاکستان کے اس اقدام سے بھارتی ائیر لائنز کو ایک ہی روز میں کروڑوں روپے کا نقصان ہو گیا جو اب مسلسل جاری رہے گا۔